រដ្ឋមន្ត្រីមហាផ្ទៃស្នើឱ្យអាជ្ញាធរមានសមត្ថកិច្ចស្រាវជ្រាវរកអ្នកក្លែងឯកសារព្រះរាជក្រឹត្យ ដែលដំឡើងឋានៈលោករដ្ឋមន្ត្រី ទៅជាសម្តេចព្រះ អភិសន្តិបណ្ឌិត ស សុខា

ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស សុខា តាមរយៈទំព័រហ្វេសប៊ុករបស់លោក នៅប៉ុន្មានម៉ោងមុននេះ បានស្នើឱ្យអាជ្ញាធរមានសមត្ថកិច្ចស្រាវជ្រាវតាមចាប់ខ្លួនបុគ្គល ដែលក្លែងឯកសារព្រះរាជក្រឹត្យ ដំឡើងឋានៈលោក ទៅជាសម្តេចក្រុមព្រះ អភិសន្តិបណ្ឌិត ស សុខា។

លោក ស សុខា បញ្ជាក់ថា៖«ខ្ញុំសូមបដិសេធចំពោះព័ត៌មានក្លែងក្លាយនេះ និងសូមអាជ្ញាធរមានសមត្ថកិច្ចស្រាវជ្រាវដើម្បីនាំខ្លួនជនល្មើសយកមកផ្តន្ទាទោសទៅតាមច្បាប់»។

ព្រះរាជក្រឹត្យមួយច្បាប់ ដែលគេដឹងថា ជាព្រះរាជក្រឹត្យក្លែងក្លាយ ដោយបានចុះថ្ងៃទី០១ ខែកញ្ញា ឆ្នាំ២០២៤ ដែលយកលំនាំតាមព្រះរាជក្រឹត្យរបស់ព្រះករុណាព្រះមហាក្សត្រ នរោត្តម សីហមុនី បានដំឡើងឋានៈលោក ស សុខា ដោយសរសេថា ដំឡើងព្រះឋានៈសម្តេចព្រះមហិស្សរា អភិសន្តិបណ្ឌិត ស សុខា ជាសម្តេចក្រុមព្រះ អភិសន្តិបណ្ឌិត ស សុខា។

អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន និងអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សំ វិច្ឆិកា មិនអាចទាក់ទងសុំការបញ្ជាក់ពីការតាមចាប់ខ្លួនបុគ្គលក្លែងឯកសារនេះបានទេ នៅថ្ងៃទី៣ កញ្ញា៕