ម្តាយមីងនាយករដ្ឋមន្ត្រី ចេញមុខការពារត្រកូលរបស់គាត់ ដោយរិះគន់មន្ត្រីធំៗនៅក្រោមការដឹកនាំរបស់ក្មួយ ថា បានប្រព្រឹត្តអំពើពុករលួយរាប់លានដុល្លារ
លោកស្រី ហ៊ុន ស៊ីណាត ដែលគេស្គាល់ថា ជាម្តាយមីងលោកនាយករដ្ឋមន្ត្រី ហ៊ុន ម៉ាណែត និងត្រូវជាប្អូនបង្កើតរបស់មេដឹកនាំដ៏មានអំណាចខ្លាំង គឺ លោក ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា បានចេញមុខរិះគន់មន្ត្រីមួយចំនួនរបស់រដ្ឋាភិបាល ក្រោមការដឹកនាំរបស់ក្មួយលោកស្រី ថា បានប្រព្រឹត្តអំពើពុករលួយក្នុងទំហំច្រើនសន្ធឹក និងសម្ញែងទ្រព្យមិនខ្វល់នឹងការរិះគន់។
តាមរយៈទំព័រហ្វេសប៊ុករបស់ខ្លួន កាលពីថ្ងៃទី២៥ ធ្នូ ឆ្នាំ២០២៤ លោកស្រី ហ៊ុន ស៊ីណាត បានសរសេរថា៖«មានមន្ត្រីខ្លះពុករលួយលុយ…តែវានៅតែមានមហិច្ឆតាចង់បានរបស់គេ ហើយចេះប្រឌិតចោទប្រកាន់គេគ្រប់វិធី។ ម្យ៉ាងទៀត ម្នាក់ៗខំសម្ញែងណាស់ ដល់គេជេរ មកជេរតែត្រកូលហ៊ុន ដែលបុគ្គលខ្ញុំនេះមិនដែលពុករលួយផង»។
ជុំវិញការរិះគន់របស់លោកស្រី ហ៊ុន ស៊ីណាត ពាក់ព័ន្ធអំពើពុករលួយរបស់មន្ត្រីនេះ អ្នកនាំពាក្យរាជរដ្ឋាភិបាល និងជារដ្ឋមន្ត្រីប្រតិភូអមនាយករដ្ឋមន្ត្រី លោក ប៉ែន បូណា មិនធ្វើអត្ថាធិប្បាយទេ ដោយលោកចាត់ទុកជាទស្សនៈផ្ទាល់ខ្លួនរបស់លោកស្រី ហ៊ុន ស៊ីណាត៕
