អ្នកនាំពាក្យអួតពីកម្ពុជា រីកចម្រើនលើសពីគ្រប់ជំនាន់ ក្នុងសករាជ ដែលលោកហៅថា តេជោ-ធិបតី បក្សជំទាស់ថាលើកជ្រុលពេក ក្នុងគ្រាកសិករកំពុងវេទនា កសិផលកកស្ទះ និងហ៊ុមព័ទ្ធដោយបំណុល

រដ្ឋមន្ត្រីប្រតិភូអមនាយករដ្ឋមន្ត្រី និងជាអ្នកនាំពាក្យរាជរដ្ឋាភិបាល លោក ប៉ែន បូណា បានអួតសរសើរពីកម្ពុជា មានការអភិវឌ្ឍរីកចម្រើនច្រើនវិស័យលើសពេលណាៗទាំងអស់ ក្រោមការដឹកនាំរបស់លោក ហ៊ុន សែន-ហ៊ុន ម៉ាណែត ដែលលោកហៅថា ក្នុងសករាជតេជោ-ធិបតី ប៉ុន្តែប្រធានគណបក្សជំនាន់ថ្មី លោក មាជ សុវណ្ណារ៉ា ចាត់ទុកការលើកបែបនេះជាការអួតហួសហេតុពេក ក្នុងគ្រាដែលកសិករកំពុងរងទុក្ខវេទនា ដោយសារកសិផលស្រូវ ដំណាំដាំដុះពិបាករកទីផ្សារ ព្រមទាំងហ៊ុមព័ទ្ធដោយបំណុល និងពលករចំណាកស្រុករាប់សែនវិលចូលស្រុកវិញគ្មានការងារធ្វើ។

លោក ប៉ែន បូណា ថ្លែងក្នុងសន្និសីទសារព័ត៌មាននាថ្ងៃទី២៥ ខែសីហា ថា៖«នៅក្នុងប្រវត្តិសាស្ត្រសម័យទំនើបជាង៥០០ឆ្នាំចុងក្រោយ គិតចាប់តាំងពីក្រោយសម័យអង្គរមក កម្ពុជាក្នុងសករាជតេជោ-ធិបតី បានស្គាល់ការអភិវឌ្ឍលូតលាស់ខ្លាំងជាងពេលណាៗទាំងអស់។ កម្ពុជាស្គាល់សុខសន្តិភាពពេញលេញ យូរអង្វែងជាងពេលណាៗទាំងអស់។ កម្ពុជាមានហេដ្ឋារចនាសម្ព័ន្ធសង្គមល្អ ដែលបង្កលក្ខណៈងាយស្រួលដល់ប្រជាពលរដ្ឋក្នុងការធ្វើដំណើរបានស្រួល និងឆាប់រហ័សជាងពេលណាៗទាំងអស់។ កម្ពុជាមានមធ្យោបាយធ្វើដំណើរសម្បូរបែប ទំនើបជាងពេលណាទាំងអស់»។

លោក មាជ សុវណ្ណារ៉ា ថ្លែងនៅថ្ងៃទី២៥ ខែសីហា ថា៖«មកដល់ពេលឥឡូវហ្នឹង តើយើងជួបវិបត្តិ ដែលពលរដ្ឋអត់ការងារធ្វើចំណាកចោលស្រុក ហើយត្រឡប់ពីប្រទេសថៃមកចូលស្រុកខ្មែរវិញជាង១លាននាក់ តើគាត់ជួបបញ្ហាសេដ្ឋកិច្ចហិរញ្ញវត្ថុបែបណាទៅនឹងបំណុល ទៅនឹងជីវភាពរស់នៅប្រចាំថ្ងៃ ទំនិញកសិផលកកស្ទះគ្មានទីផ្សារ ទៅនឹងបំណុលធនាគារជាដើម អាចំណុចទាំងអស់ហ្នឹង សួរទៅវិញថា តើការរីកចម្រើនបែបណា? វាហួសហេតុពេក គ្មានរបបណាអភិវឌ្ឍជាងរបបនេះ។ របបនេះខ្ចីលុយកាក់គេ»៕