រឿងកាន់តែរីក បើមេដឹកនាំថៃ និងមេដឹកនាំកម្ពុជា នៅបន្តប្រើយុទ្ធវិធីផ្ចាញ់ផ្ចាល និងទប់ទល់! មកដល់ថ្ងៃនេះសាលាចំនួន៣ របស់ថៃ បានដកហូតសញ្ញាបត្រពីមេដឹកនាំកម្ពុជា លោក ហ៊ុន សែន

ប្រធានព្រឹទ្ធសភា លោក ហ៊ុន សែន នៅយប់ថ្ងៃទី២២ សីហា នេះ បានឆ្លើយតបទៅថៃ ក្រោយសាលារបស់ថៃចំនួន ៣ បានដកហូតសញ្ញាបត្រពីលោកវិញ ក្នុងគ្រាដែលកម្ពុជា និងថៃ បាននិងកំពុងមានជម្លោះព្រំដែន ដែលមិនទាន់រកច្រកបញ្ចប់បាន ដោយលោកប្រាប់ទៅថៃថា លោកបានបោះសញ្ញាបត្រទាំងនោះចោលអស់យូរហើយ ព្រោះវាគ្មានតម្លៃអ្វីដែលលោកត្រូវរក្សាទុក។

ការឆ្លើយតបទៅថៃបែបនេះ ក្រោយលោកបានឃើញថា នៅថ្ងៃនេះ សាលាមួយទៀតរបស់ថៃ បានប្រកាសដកហូតសញ្ញាបត្រពីលោក ក្រោយពីសាលាទី១ បានប្រគល់ជូនលោកកាលពីឆ្នាំ២០០១ សាលាទី២ បានប្រគល់ជូនលោកនៅឆ្នាំ២០០៦ និងសាលាទី៣ បានប្រគល់ជូនលោកនៅឆ្នាំ២០១៩។

លោក ហ៊ុន សែន ប្រាប់ទៅថៃថា៖«សូមបញ្ជាក់ទៅវិញថា សញ្ញាបត្រទាំង ៣សាលា របស់ថៃ ដែលធ្លាប់ប្រគល់ឱ្យខ្ញុំ ខ្ញុំបានបោះវាចោលអស់យូរហើយ វាគ្មានតម្លៃសោះឡើយ សម្រាប់ខ្ញុំរក្សាទុក! ខ្ញុំមិនមានមោទនភាពណាមួយចំពោះក្រដាសមួយសន្លឹករបស់អ្នកនោះឡើយ។ ខួរក្បាល និងចំណេះដឹងរបស់ខ្ញុំមិនមែនកើតចេញ[ពី]សញ្ញាបត្រមួយសន្លឹករបស់អ្នក ឬសាលារៀនថៃនោះទេ ប្រជាជនកម្ពុជា និងសាលារៀនរបស់កម្ពុជា គឺជាអ្នកបង្រៀនខ្ញុំ»។

អតីតនាយករដ្ឋមន្ត្រីកម្ពុជា បន្តថា៖«ខ្ញុំគួរតែប្រាប់ពួកអ្នកវិញថា បើពិនិត្យពីពេលវេលា ដែលពួកអ្នកសុំប្រគល់សញ្ញាបត្រឱ្យខ្ញុំ (ខ្ញុំអត់បានស្នើសុំពីពួកអ្នកទេ) និងពេលវេលា ដែលខ្ញុំកាន់តំណែងក្នុងកិច្ចការជាតិ សញ្ញាបត្ររបស់អ្នក គ្មានជួយអ្វីដល់ខ្ញុំទេ ព្រោះសញ្ញាបត្របានផ្តល់ឱ្យខ្ញុំ ក្រោយជោគជ័យរបស់ខ្ញុំ»។

ជាមួយនឹងការឆ្លើយតបនេះ លោកក៏បានបង្ហាញពីប្រវត្តិការងារ ដែលលោកចាត់ទុកជាជោគជ័យ ដោយបញ្ជាក់ថា ឆ្នាំ១៩៧៩ លោកអាយុ២៧ឆ្នាំ ជារដ្ឋមន្រីក្រសួងការបរទេស។ ឆ្នាំ១៩៨១ អាយុ២៩ឆ្នាំ ជាឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងឆ្នាំ១៩៨៥ អាយុ៣២ឆ្នាំ ជានាយករដ្ឋមន្ត្រី។

ជាងនេះទៀត លោក ហ៊ុន សែន ក៏បានប្រើពាក្យសម្តីបញ្ឈឺទៅថៃ ថា៖«ខ្ញុំគិតថាពួកអ្នកនឹងមានការអៀនខ្មាស ប្រសិនបើពួកអ្នកពិនិត្យឡើងវិញ នូវការវាយតម្លៃរបស់ពួកអ្នកលើគុណសម្បត្តិរបស់ខ្ញុំ នៅពេលអ្នកសុំខ្ញុំឱ្យទទួលសញ្ញាបត្ររបស់អ្នក។ ខ្ញុំនឹងឱ្យខុទ្ទកាល័យរបស់ខ្ញុំ ផ្សព្វផ្សាយអំពីការវាយតម្លៃរបស់ពួកអ្នកមកលើគុណសម្បត្តិរបស់ខ្ញុំ ក្នុងគោលបំណងកុំឱ្យពួកអ្នកភ្លេច។ ពួកអ្នកមិនអាចកែប្រែអតីតកាលបានទេ ហើយខ្ញុំក៏ចង់ប្រាប់ពួកអ្នកថា ពួកអ្នកទេ ដែលមកស្នើខ្ញុំឱ្យទទួលសញ្ញាបត្រនោះ អមដោយការវាយតម្លៃមកជាមួយផង។ ឯការសម្រេចទទួល ឬមិនទទួលស្ថិតនៅលើ ហ៊ុន សែន ព្រោះខ្ញុំក៏មិនចេះតែទទួលយកនោះដែរ»៕