មេដឹកនាំកម្ពុជា លោក ហ៊ុន សែន ប្រតិកម្មទៅនាយករដ្ឋមន្ត្រីស្តីទីថៃ លោក Phumtham ដែលប្រកាសចាប់ខ្លួនលោក និងហ៊ុន ម៉ាណែត ដោយថា បើមេដឹកនាំថៃប្រើសម្តីនេះមែន គឺជាមនុស្សព្រៃ

ប្រធានព្រឹទ្ធសភាកម្ពុជា លោក ហ៊ុន សែន បានបញ្ជាក់ថា នាយករដ្ឋមន្ត្រីស្តីទីថៃ លោក Phumtham Wechayachai ប្រកាសចាប់ខ្លួនលោក និងលោកនាយករដ្ឋមន្ត្រី ហ៊ុន ម៉ាណែត ភ្លាមៗ បើរកឃើញក្នុងប្រទេសថៃ បើពាក្យសម្តីនេះជាការពិតដូចការផ្សព្វផ្សាយរបស់សារព័ត៌មានមែន នោះមេដឹកនាំថៃរូបនេះគឺជាមនុស្សព្រៃ មិនស្គាល់អ្វីទៅជាច្បាប់ទម្លាប់ និងមិនចេះការទូតទៀតផង។

តាមរយៈសំណេរលើហ្វេសប៊ុកនៅយប់ថ្ងៃទី១៨ សីហា លោក ហ៊ុន សែន បញ្ជាក់ថា៖«ប្រសិនបើថៃអាចចាប់មេដឹកនាំកម្ពុជាបាន កម្ពុជាក៏អាចចាប់មេដឹកនាំថៃមួយចំនួន ដែលបានឈ្លានពាន និងសម្លាប់ប្រជាជនកម្ពុជាបានដូចគ្នាដែរ។ ច្បាប់ទម្លាប់ត្រូវបានបំផ្លាញ ដោយពួកឈ្លានពាន។ តើនេះជាគោលបំណង ដើម្បីបង្កើតជំនឿទុកចិត្ត និងឈានទៅរកទំនាក់ទំនងល្អ ឬបំផ្លាញ ដើម្បីបង្កើតជម្លោះឡើងវិញ ក្រោយកិច្ចព្រមព្រៀងឈប់បាញ់»?

សារព័ត៌មានថៃ Khaosod បានផ្សាយនៅយប់ថ្ងៃទី១៨ សីហា ដោយស្រង់សម្តីលោក Phumtham ថា បើរកឃើញលោក ហ៊ុន សែន និងលោក ហ៊ុន ម៉ាណែត នៅក្នុងប្រទេសថៃ មេដឹកនាំកម្ពុជាទាំងពីររូបនឹងត្រូវចាប់ខ្លួនភ្លាមៗតែម្តង ដោយអះអាងថា ក្រុមប្រឹក្សាសន្តិសុខជាតិ បានចាត់ឱ្យបូលិស និងព្រះរាជអាជ្ញា ដើម្បីដំណើរការ ដោយដាក់បណ្តឹងរដ្ឋប្បវេណី និងព្រហ្មទណ្ឌប្រឆាំងនឹងមេដឹកនាំកម្ពុជានៅតុលាការថៃ៕