អ្នកអត្ថាធិប្បាយនយោបាយដ៏ល្បី លោក ស៊ន តារា ឌឺដងឱ្យលោក ហ៊ុន សែន ករណីចាប់ឪពុកលោកដាក់ពន្ធនាគារ ថា ឪពុកកាន់អាវុធស្មោះត្រង់នឹងជាតិ គ្មានវាសនាដូចអ្នកជេរប្រមាថ

លោក ស៊ន តារា អ្នកអត្ថាធិប្បាយនយោបាយដ៏ល្បីល្បាញ ដែលតែងតែបាញ់ឆ្ពោះទៅលោក ហ៊ុន សែនប្រធានគណបក្សប្រជាជនកម្ពុជា និងជាប្រធានព្រឹទ្ធសភា បានដៀមដាមទៅមេដឹកនាំរូបនេះ ករណីឪពុកលោកត្រូវបានចាប់ដាក់ពន្ធនាគារពីបទរក្សាទុកសារធាតុញៀន ដោយលោកថាឪពុកលោកកាន់អាវុធច្បាំងការពារស្មោះត្រង់នឹងជាតិ តែបែរជាគ្មានវាសនាដូចអ្នកដែលជេរប្រមាថកប់ៗមាត់លើលោក ហ៊ុន សែន។

នៅលើទំព័រហ្វេសប៊ុករបស់ខ្លួន នាវេលាល្ងាចថ្ងៃទី២៧ ខែវិច្ឆិកា លោក ស៊ន តារា បានសរសេរថា៖«ឆ្នាំ២០២៣ ប៉ាមានកិត្តិយសដ៏អស្ចារ្យបំផុតក្នុងឆាកជីវិត ដែលត្រូវបានសម្តេច [ហ៊ុន សែន] ហៅជួបសួរសុខទុក្ខនៅគេហដ្ឋានសម្តេចផ្ទាល់ ក្រោយពេលសម្តេចខឹងព្រមានខ្ញុំឱ្យបិទមាត់ដ៏មានឥទ្ធិពល ឆ្នាំ២០២៤ ប៉ាត្រូវគេចាប់ដាក់គុកក្រោមម្លប់សន្តិភាព»។

សំណេររបស់លោក ស៊ន តារា បានបញ្ជាក់ទៀតថា៖«ប៉ាកាន់អាវុធច្បាំងយកជីវិតជាទុនការពារជាតិ ស្មោះត្រង់រហូតកម្ពុជាចប់សង្គ្រាមប្រដាប់អាវុធ សមណាស់តែប៉ាទទួលផលសុខ តែបែរជាដេកគុកយ៉ាងខ្លោចផ្សា គ្មានវាសនាដូចអ្នកជេរប្រមាថសម្តេចអសុរោះកប់ៗមាត់។ សូមប៉ាមានសុខភាពល្អជានិច្ច»។

The Cambodia Now News (CNN) នៅមិនទាន់អាចទាក់ទងសុំអត្ថាធិប្បាយពីលោក សុខ ឥសាន អ្នកនាំពាក្យគណបក្សប្រជាជនកម្ពុជា ជុំវិញសំណេរ របស់លោក ស៊ន តារា បាននៅឡើយទេ នាល្ងាចថ្ងៃទី២៧ វិច្ឆិកា នេះ៕