អតីតមន្ត្រីគណបក្សហ្វ៊ុនស៊ិនប៉ិច បង្ហើបថា ការង្គោះរង្គើផ្ទៃក្នុងគណបក្ស ដោយសារមេដឹកនាំបន្តវេន អនុវត្តការងារផ្ទៃក្នុងបក្សមិនយុត្តិធម៌ សម្រាប់មន្ត្រីចាស់ៗ

អតីតមន្ត្រីជាន់ខ្ពស់គណបក្សហ្វ៊ុនស៊ិនប៉ិចម្នាក់ សុំមិនបញ្ចេញឈ្មោះ ប្រាប់ថា ការបែកបាក់ផ្ទៃក្នុងគណបក្ស ដោយសារមេដឹកនាំបន្តវេន យកបណ្តាំរបស់សម្តេចក្រុមព្រះ និងការសន្យាជួយរបស់លោកហ៊ុន សែន មកអនុវត្តក្នុងការងារបក្សមិនយុត្តិធម៌ សម្រាប់មន្ត្រីចាស់ៗ ដែលធ្លាប់ដង្ហែតាមសម្តេចព្រះបរមរតនកោដ្ឋ រហូតដល់សម្តេចក្រុមព្រះ នរោត្តម រណឫទ្ធិ។

កាលពីសប្តាហ៍មុន The Cambodia Now News(CNN) ទទួលបានលិខិត ២ច្បាប់ ដែលជាលិខិតឆ្លើយឆ្លងគ្នា កាលពីឆ្នាំ២០១៩ រវាងសម្តេចក្រុមព្រះ និងលោក ហ៊ុន សែន ដែលជានាយករដ្ឋមន្ត្រីនាពេលនោះ។ ព្រះរាជសារលិខិតរបស់សម្តេចក្រុមព្រះ នរោត្តម រណឫទ្ធិ កាលពីព្រះអង្គនៅមានព្រះជន្ម គង់ជាប្រធានគណបក្សហ៊្វុនស៊ិនប៉ិច ផ្ញើជូនលោក ហ៊ុន សែន សុំជួយឧបត្ថម្ភគាំទ្រ ព្រះអង្គម្ចាស់ នរោត្តម ចក្រាវុធ ដែលជាបុត្រារបស់ព្រះអង្គ ក្នុងកិច្ចការនយោបាយ។ លោកហ៊ុន សែន ក៏បានថ្វាយលិខិតទៅសម្តេចក្រុមព្រះវិញ ដោយបញ្ជាក់ថា លោកយល់ព្រមជួយព្រះអង្គម្ចាស់ នរោត្តម ចក្រាវុធ តាមសំណើរបស់សម្តេចក្រុមព្រះ។

អតីតមន្ត្រីជាន់ខ្ពស់ដែលសុំមិនបញ្ចេញឈ្មោះរូបនោះឱ្យដឹងថា៖«លិខិតរបស់សម្តេចតេជោនេះហើយ ដែលជនឱកាសនិយមនៅក្បែរ នរោត្តម ចក្រាវុធ យកមកធ្វើជាខ្នងបង្អែក ប្រព្រឹត្តអំពើពុករលួយ គ្រួសារនិយ បក្ខពួកអញនិយម រំលោភអំណាច ប្រាសចាកពីបណ្តាំសម្តេចក្រុមព្រះ នរោត្តម រណឫទិ្ធ និងដៃគូ សហការ បង្រួបបង្រួមជាតិ ផ្សះផ្សាជាតិ»។

មន្ត្រីដដែលថា៖«បានសម្តេចតេជោជួយជ្រោមជ្រែង ការពារ ក្រអឺតក្រទម ដោយឱ្យ២-៣នាក់ធ្វើតាមចិត្ត។ មន្ត្រីចាស់ៗបម្រើតាំងពីព្រះបរមរតនកោដ្ឋ[រហូតដល់]សម្តេចក្រុមព្រះ[២-៣នាក់នោះ]ដកបណ្តេញស្រេចចិត្តមិនគោរពច្បាប់ បក្ស បទបញ្ជាផ្ទៃក្នុងបក្ស។ សរុបសេចក្តីមក ជនបន្តវេនដែលជាបុត្រាច្បង សម្តេចក្រុមព្រះ តើក្បត់ព្រះរាជបណ្តាំ សម្តេចក្រុមព្រះ នរោត្តម រណឫទ្ធិ និងក្តីសង្ឃឹម សម្តេចតេជោសែន ឬទេ?»

ក្នុងព្រះរាជសារ សម្តេចក្រុមព្រះក៏បានប្រាប់លោក ហ៊ុន សែន ថា លោក ញឹក ប៊ុនឆៃ និងសហការីក្នុងគណបក្សរួបរួមជាតិ បានមកថ្វាយបង្គំគាល់ព្រះអង្គ នៅដំណាក់វាលស្បូវ។ នាឱកាសនោះ លោកញឹក ប៊ុនឆៃ បានគាំទ្រ និងឯកភាពទទួលយកទាំងស្រុង ដោយសោមនស្សរីករាយ ចំពោះគំនិតផ្តួចផ្តើមរបស់ព្រះអង្គ ដែលមានគោលធំៗ គឺការបង្រួបបង្រួមគណបក្សទាំងពីរឡើងវិញ ឱ្យបានឆាប់បំផុត។ ប្រមែប្រមូលអ្នករាជានិយម អ្នកសីហនុនិយម មករួបរួមគ្នាក្នុងគណបក្សហ្វ៊ុនស៊ិនប៉ិចតែមួយ។ បញ្ឈប់ជម្លោះផ្ទៃក្នុង ការវាយប្រហារគ្នា ការលាបពណ៌គ្នា ដែលជាឈ្នួននាំដល់ការបែកបាក់ បាត់បង់ឯកភាព និងសាមគ្គីភាព។

តាមរយៈព្រះរាជសារ សម្តេចក្រុមព្រះបានបញ្ជាក់ថា៖«ខ្ញុំសូមឆ្លៀតឱកាសនេះ ក្នុងមនោសញ្ចេតនាជឿជាក់ និងស្មោះស្ម័គ្របំផុតចំពោះសម្តេចប្អូន ជាទីគោរពស្រឡាញ់ សូមមេត្តាជួយចែករំលែកបទពិសោធន៍ និងផ្តល់ដំបូន្មានដ៏ថ្លៃថ្លា ព្រមទាំងឧបត្ថម្ភគាំទ្រ ចំពោះព្រះអង្គម្ចាស់ នរោត្តម ចក្រាវុឌ្ឍ បុត្រារបស់ខ្ញុំ ក្នុងការប្រឡូកកិច្ចការនយោបាយនៅក្នុងកាលៈទេសៈបច្ចុប្បន្ននេះ ជំនួសរូបខ្ញុំផង»។

ជាការឆ្លើយតប អតីតលោកនាយករដ្ឋមន្ត្រី ហ៊ុន សែន បានសម្តែងនូវក្តីរីករាយ និងគាំទ្រអំពីព្រះរាជបំណងរបស់សម្តេចក្រុមព្រះ និងគោលបំណងរបស់លោក ញឹក ប៊ុនឆៃ ដើម្បីបង្រួបបង្រួមឡើងវិញ រវាងគណបក្សហ៊្វុនស៊ិនប៉ិច និងគណបក្សខ្មែររួបរួមជាតិក្នុងក្របខ័ណ្ឌគណបក្សហ្វ៊ុនស៊ិនប៉ិចតែមួយ។

តាមរយៈលិខិត លោក ហ៊ុន សែន បញ្ជាក់ថា៖«ចំពោះព្រះអង្គម្ចាស់ នរោត្តម ចក្រាវុឌ្ឍ ទូលព្រះបង្គំសូមទូលថ្វាយសម្តេចថា សូមសម្តេចមានការទុកព្រះទ័យចុះ ទូលព្រះបង្គំ នឹងថ្វាយនូវកិច្ចសហប្រតិបត្តិការ ដូចដែលទូលព្រះបង្គំធ្លាប់បានថ្វាយដល់សម្តេចជាទីគោរពស្រឡាញ់ដែរ»។

នៅពេលទាក់ទងតាមប្រព័ន្ធតេឡេក្រាម កាលពីថ្ងៃទី៥ ខែតុលា លោក អាំង សំបូរ អគ្គលេខាធិការគណបក្សហ្វ៊ុនស៊ិនប៉ិច មិនទាន់ឆ្លើយតបនៅឡើយទេ រហូតមកដល់ពេលចេញផ្សាយនាថ្ងៃទី៧ ខែតុលានេះ។ The Cambodia Now News (CNN) ក៏បានទាក់ទងលោក ញឿន រ៉ាដែន អ្នកនាំពាក្យគណបក្សហ្វ៊ុនស៊ិនប៉ិច ដើម្បីសុំការបកស្រាយបំភ្លឺ ប៉ុន្តែលោកបានបដិសេធធ្វើអត្ថាធិប្បាយ ៕