Hot News Always

ភាគីកម្មកររោងចក្រ ទាមទារការដំឡើងប្រាក់ឈ្នួលអប្បបរមារបស់ខ្លួន$១៤បន្ថែមលើប្រាក់ឈ្នួលបច្ចុប្បន្ន $២០៤ ខណៈភាគីថៅកែរោងចក្រ ព្រមផ្តល់ជូនតែ $១ប៉ុណ្ណោះ

1

ក្រោយពីកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា ដែលពិភាក្សាអំពីកំណើនប្រាក់ឈ្នួលរបស់កម្មកររោងចក្រនៅថ្ងៃទី២៩ សីហា ភាគីកម្មករនិយោជិតរោងចក្រ បានទាមទារការដំឡើងប្រាក់ឈ្នួលអប្បបរមារបស់ខ្លួនចំនួន ១៤ដុល្លារអាមេរិក បន្ថែមលើតួលេខបច្ចុប្បន្ន២០៤ដុល្លារ។ ឯភាគីថៅកែឬនិយោជករោងចក្រ ព្រមដំឡើងជូនតែ ១ដុល្លារលើប្រាក់ឈ្នួល២០៤ដុល្លារ។

ការទាមទារដំឡើងប្រាក់ឈ្នួលរបស់ភាគីកម្មករនិយោជិតឱ្យបានចំនួន១៤ដុល្លារអាមេរិកបន្ថែមពីលើប្រាក់ឈ្នួលបច្ចុប្បន្ន ២០៤ដុល្លារ ដែលសរុបកើនបាន២១៨ដុល្លារ។ បើតាមប្រភពពីសហភាពការងារកម្ពុជា ដែលបានទៅចូលរួមពិភាក្សាលើការទាមទារប្រាក់ឈ្នួល តួលេខនេះ គឺគ្រាន់តែដើម្បីយកទៅចរចាជាមួយភាគីថៅកែ ឬនិយោជករោងចក្រតែប៉ុណ្ណោះ។ នេះ មានន័យថា តួលេខនេះ នឹងអាចធ្លាក់មកនៅក្រោមចំនួន២១៨ដុល្លារវិញ សម្រាប់ប្រាក់ឈ្នួលរបស់កម្មករ។

សហភាពការងារកម្ពុជា បានបញ្ជាក់ថា៖«តំណាងភាគីកម្មករបានលើកឡើងនូវតួលេខចំនួន ២១៨ដុល្លារអាមេរិក ដើម្បីចរចាជាមួយភាគីនិយោជក និងរាជរដ្ឋាភិបាល»។

លោក គង់ អាទិត្យ ប្រធានសហភាពការងារកម្ពុជា ដែលបានចូលរួមពិភាក្សាលើការទាមទារប្រាក់ឈ្នួលកម្មករ ប្រាប់ The Cambodia Now News(CNN) នៅថ្ងៃទី២៩ សីហា ថា តាមយន្តការ ក្រុមការងារ នឹងបន្តការចរចាក្រោមការដឹកនាំរបស់លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។

លោកគង់ អាទិត្យ ថ្លែងថា៖«ខ្ញុំជឿជាក់ថា នឹងមានការកើនបន្ថែមទៀតនៅថ្ងៃបន្តទៀត»។
សេចក្តីប្រកាសព័ត៌មានរបស់ក្រសួការងារ និងបណ្តុះបណ្តាលវិជ្ជាជីវៈ នៅថ្ងៃទី២៩ ខែសីហា ឆ្នាំ២០២៤ ឱ្យដឹងថា ក្រុមប្រឹក្សាជាតិប្រាក់ឈ្នួលអប្បបរមា បានបន្តកិច្ចប្រជុំរបស់ខ្លួន ដើម្បីបន្តពិភាក្សាកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ២០២៥។

បើតាមសេចក្តីប្រកាសដដែល ក្នុងកិច្ចប្រជុំ៤លើក តំណាងភាគីរដ្ឋាភិបាល ក៏បានសម្របសម្រួល និងផ្តល់នូវការពន្យល់លើចំណុចនានា ដែលតំណាងភាគីកម្មករនិយោជិត និងតំណាងភាគីនិយោជកមានចម្ងល់ផងដែរ។ ជាលទ្ធផល តំណាងភាគីកម្មករនិយោជិត បានលើកឡើងនូវតួលេខកំណើនចំនួន ១៤ដុល្លារអាមេរិកលើតួលេខបច្ចុប្បន្ន ២០៤ដុល្លារអាមេរិក។ ចំណែកតំណាងភាគីនិយោជក បានលើកឡើងនូវតួលេខកំណើនចំនួន ១ដុល្លារអាមេរិក លើតួលេខបច្ចប្បន្ន ២០៤ដុល្លារអាមេរិក។

ដោយមិនទាន់មានចំណុចយល់ស្របគ្នា អង្គប្រជុំបានឯកភាពគ្នាកំណត់កិច្ចពិភាក្សាជាលក្ខណៈត្រីភាគីបន្តទៀត នៅថ្ងៃទី៦ ខែកញ្ញា ឆ្នាំ២០២៤៕