អគ្គមេបញ្ជាការកងទ័ព ប្រកាសជំហរបង្ក្រាប និងកម្ទេចរាល់ឧបាយកលញុះញង់ ក្នុងចេតនាបំផ្លាញជាតិ និងបំផ្លាញសន្តិភាព ខណៈពលរដ្ឋនៅក្រៅប្រទេសកំពុងធ្វើបាតុកម្មប្រឆាំងលើគម្រោង CLV

អគ្គមេបញ្ជាការនៃកងយោធពលខេមរភូមិន្ទ បញ្ជាក់ជំហរដាច់ខាតថា នឹងកម្ទេចរាល់ឧបាយកលញុះញង់ ក្នុងចេតនាបំផ្លាញជាតិ និងបំផ្លាញសន្តិភាព បង្កវិទ្ធង្សនាផ្សេងៗ ក្នុងគោលបំណងផ្តួលរំលំរាជរដ្ឋាភិបាលស្របច្បាប់ ទោះក្នុងរូបភាពណាក្តី ខណៈប្រជាពលរដ្ឋ និងក្រុមប្រឆាំងនៅក្រៅប្រទេសកំពុងធ្វើបាតុកម្មទាមទាងឱ្យរដ្ឋាភិបាលដកខ្លួនពីគម្រោងអភិវឌ្ឍន៍ត្រីកោណ កម្ពុជា ឡាវ វៀតណាម (CLV)។

លោក វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ បានចេញសេចក្តីថ្លែងការណ៍នៅថ្ងៃទី១១ ខែសីហា នេះ ដោយលើកឡើងថា ក្រុមប្រឆាំងជ្រុលនិយមមួយក្តាប់តូចនៅក្រៅប្រទេស បានអំពាវនាវ និងបំផុសញុះញង់ឱ្យប្រជាពលរដ្ឋ និងកងកម្លាំងប្រដាប់អាវុធធ្វើការបះបោរប្រឆាំងនឹងរាជរដ្ឋាភិបាល ក្នុងចេតនាបំបែកបំបាក់និងបំផ្លិញបំផ្លាញប្រទេសកម្ពុជា ដែលកំពុងមានសន្តិភាពពេញលេញនិងការអភិវឌ្ឍ។

តាមរយៈសេចក្តីថ្លែងការណ៍ លោកអគ្គមេបញ្ជាការ ប្រកាសថា៖«កងយោធពលខេមរភូមិន្ទ នឹងបង្ក្រាប និងកម្ទេច រាល់ឧបាយកលញុះញង់ក្នុងចេតនាបំផ្លាញជាតិ បំផ្លាញសន្តិភាព បង្កវិទ្ធង្សនាផ្សេៗ ក្នុងគោលបំណងផ្តួលរំលំរាជរដ្ឋាភិបាលស្របច្បាប់ ទោះក្នុងរូបភាពណាក្តី»។

លោកអគ្គមេបញ្ជាការបញ្ជាក់ថា កងយោធពលខេមរភូមិន្ទ ឈរជាមជ្ឈមណ្ឌលសាមគ្គីឯកភាពផ្ទៃក្នុងរឹងមាំ គោរពបទបញ្ជាយ៉ាងម៉ឺងម៉ាត់ ជាកម្លាំងស្មោះត្រង់ដាច់ខាត និងជាឆ្អឹងខ្នងដ៏រឹងមាំបំផុតរបស់រាជរដ្ឋាភិបាលស្របច្បាប់ ដឹកនាំដោយលោកនាយករដ្ឋមន្ត្រី ហ៊ុន ម៉ាណែត កើតចេញពីការបោះឆ្នោត។ កងយោធពលខេមរភូមិន្ទ ប្តេជ្ញាការពារ ឱ្យខាងតែបាននូវសន្តិភាព ស្ថិរភាពជាតិ និងសណ្តាប់ធ្នាប់សាធារណៈ ទោះស្ថិតក្នុងតម្លៃណាក៏ដោយ។ ការញុះញង់ប៉ុនប៉ងបង្កចលាចលផ្តួលរំលំរាជរដ្ឋាភិបាលស្របច្បាប់ ដោយប្រើមធ្យោបាយហិង្សា មិនប្រជាធិបតេយ្យ គឺជាអំពើល្មើសច្បាប់។

លោកអគ្គមេបញ្ជាការ ក៏បានបញ្ជាឱ្យមេបញ្ជាការកងទ័ពជើងគោក កងទ័ពជើងទឹក កងទ័ពអាកាស កងរាជអាវុធហត្ថលើផ្ទៃប្រទេស បញ្ជាការដ្ឋានអង្គរក្ស មេបញ្ជាការកងទ័ពជំនាញ និងប្រធានស្ថានប័នទាំងអស់ នៃកងយោធពលខេមរភូមិន្ទ ត្រូវគ្រប់គ្រងកម្លាំងឱ្យបានហ្មត់ចត់ ពង្រឹវិន័យផ្ទៃក្នុង និង«កម្ចាត់ឱ្យបានទាន់ពេលវេលានូវកម្លាំងអមិត្តទាំឡាយ»។

ទាក់ទងនឹងការប្រកាសកម្ទេចពីកងកម្លាំងប្រដាប់អាវុធ ទៅលើក្រុមមនុស្ស ដែលអគ្គមេបញ្ជាការកងទ័ព ចាត់ទុកជាក្រុមជ្រុលនិយមនោះ លោក អំ សំអាត នាយកប្រតិបត្តិ នៃអង្គការការពារសិទ្ធិមនុស្ស លីកាដូ ថ្លែងនៅថ្ងៃទី១១ ខែសីហា ថា នេះជាការពិតហើយតួនាទីរបស់រដ្ឋាភិបាល ជាពិសេសកងកម្លាំងក្នុងការការពារមិនឱ្យមានការបះបោរផ្តួលរំលំរដ្ឋាភិបាល។

លោក អំ សំអាត ថ្លែងថា៖«ប៉ុន្តែអ្វី ដែលអង្គការសង្គមស៊ីវិលយើងព្រួយបារម្ភ យើងឃើញថា កន្លងមក នៅពេលដែលមានព្រឹត្តិការណ៍អ្វីមួយកើតឡើង ឃើញមានតែប្រជាពលរដ្ឋ ដែលត្រូវរងគ្រោះជំនួសអ្នកនយោបាយទៅវិញ។ អ៊ីចឹង យើងជាអង្គការសង្គមស៊ីវិល យើងនៅតែសុំឱ្យមានការពិចារណា ព្រោះប្រទេសយើងជាប្រទេសប្រកាន់លទ្ធិប្រជាធិបតេយ្យ សេរី ពហុបក្ស។ អ៊ីចឹង ការប្រកួតប្រជែងគណបក្សនយោបាយ គឺតាមរយៈការបោះឆ្នោត»។

លោកសំអាត បន្ថែមថា៖«ប៉ុន្តែ រហូតមកទល់ពេលនេះ ខ្ញុំគិតថា មិនមានជាសញ្ញាណាមួយទេ សម្រាប់ការបះបោរណាមួយ ពីព្រោះប្រជាពលរដ្ឋយល់ច្បាស់ណាស់ទៅលើបញ្ហាទាំងអស់នេះ។ អ៊ីចឹង វាមិនមែនជាលើកទី១ទេ ព្រោះកន្លងមកកងកម្លាំងទាំងអស់ក៏ធ្លាប់មានចេញជាបទបញ្ជាក្នុងការការពាររដ្ឋាភិបាល ឬក៏ប្រឆាំងការបះបោរណាមួយ។ អាហ្នឹងជារឿងធម្មតារបស់កងទ័ព៕