ក្រសួងការពារជាតិ បញ្ជាក់ថា ក្រុមជួយសង្គ្រោះ នៅតែបន្តស្វែងរកឧទ្ធម្ភាគចក្រយោធា ១គ្រឿង ដែលកំពុងហ្វឹកហាត់ ហើយបានបាត់ការទាក់ទងនៅជួរភ្នំក្រវាញ រហូតមកដល់ថ្ងៃសៀលនេះ

ក្រសួងការពារជាតិ បានឱ្យដឹងថា នៅរសៀលថ្ងៃទី១៤ កក្កដា នេះ ក្រុមជួយសង្គ្រោះ នៅតែកំពុងបន្តស្វែងរកឧទ្ធម្ភាគចក្រយោធាហ្វឹកហ្វឺន១គ្រឿង ដែលបានបាត់ការទាក់ទងជាមួយទីបញ្ជាការកងទ័ពជើងអាកាស កាលពីថ្ងៃទី១២ ខែកក្កដា ឆ្នាំ២០២៤ ក្នុងភូមិសាស្ត្រជួរភ្នំក្រវាញ នៅខេត្តពោធិ៍សាត់ និងខេត្តកោះកុង ក្នុងពេលកំពុងហ្វឹកហាត់។ នេះបើតាទីភ្នាក់ងារសារព័ត៌មានកម្ពុជា AKP។

ឧបទ្ទវហេតុនេះ បានកើតឡើង ក្នុងអំឡុងពេលកំពុងហោះហើរហ្វឹកហ្វឺន ដែលការហោះហើរនេះស្ថិតក្នុងផែនការហោះហើរហ្វឹកហ្វឺនជាប្រចាំរបស់កងទ័ពជើងអាកាសនៅតំបន់នោះ។ សមាសភាព ដែលស្ថិតក្នុងឧទ្ធម្ភាគចក្រនោះ មានចំនួន ២នាក់ គឺប្រធានក្រុមម្នាក់ និងអាកាសយានិកម្នាក់។ នេះបើតាមក្រសួងការពារជាតិ។

ក្រសួងការពារជាតិ ក៏បានថ្លែងអំណរគុណ ចំពោះវិស័យឯកជន ដែលមានបំណងចង់ចូលរួមជួយរុករកជាមួយក្រុមការងាររុករក និងជួយសង្គ្រោះផងដែរ។ ប៉ុន្តែក្រសួង ក៏បានបញ្ជាក់ថា ដោយសារស្ថានភាពអាកាសធាតុនៅទីតាំងប្រតិបត្តិការ ជាតំបន់ព្រៃក្រាស់ ចុះអ័ព្ទខ្លាំង ក្រុមការងារជួយសង្គ្រោះបានដាក់ទិសដៅពង្រាយកម្លាំងក្នុងតំបន់នេះរួចហើយ។ ដូច្នេះ សូមទុកលទ្ធភាពឱ្យក្រុមការងាររុករក និងជួយសង្គ្រោះបន្តប្រតិបត្តិការសិន៕