បេឡាជាតិសន្តិសុខសង្គម (បសស) ជំរុញឱ្យពេទ្យឯកជនជាដៃគូត្រូវប្រញាប់ដាក់ពាក្យស្នើសុំចុះកិច្ចព្រម ព្រៀងឡើងវិញ

បេឡាជាតិសន្តិសុខសង្គម (ប.ស.ស.)បានឱ្យមូលដ្ឋានសុខាភិបាលឯកជនដែលជាដៃគូរបស់ប.ស.ស. ត្រូវប្រញាប់ដាក់ពាក្យស្នើសុំចុះកិច្ចព្រមព្រៀងឡើងវិញ។ ក្នុងករណីខកខានក្នុងការដាក់ពាក្យស្នើសុំឡើងវិញ តាមការកំណត់ចាត់ទុកថា បានបញ្ចប់កិច្ចព្រមព្រៀងដោយស្វ័យប្រវត្តិ។

លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. បានបញ្ជាក់ក្នុងសេចក្តីជូនដំណឹងមួយដែលទើបទទួលបាននៅថ្ងៃទី១០ កក្កដា នេះ បានណែនាំដល់លោក លោកស្រី ជានាយកនាយិកា ប្រធាន មូលដ្ឋាន សុខាភិបាលឯកជន ដែលបានចុះកិច្ចព្រមព្រៀងជាមួយបេឡាជាតិសន្តិសុខសង្គមរួចហើយ ត្រូវដាក់ពាក្យស្នើសុំចុះកិច្ចព្រមព្រៀងឡើងវិញ តាមទីតាំងភូមិសាស្ត្រ និងកាលបរិច្ឆេទដូចខាងក្រោម។

ចំពោះមូលដ្ឋានសុខាភិបាលឯកជន ដែលមានទីតាំងស្ថិតនៅរាជធានីភ្នំពេញ ខេត្តកណ្តាល និងខេត្តកំពង់ស្ពឺត្រូវដាក់ពាក្យស្នើសុំចាប់ពីថ្ងៃទី៩ ខែកក្កដា រហូតដល់ថ្ងៃទី៩ ខែសីហា ឆ្នាំ២០២៤។

ចំណែកមូលដ្ឋានសុខាភិបាលឯកជន ដែលមានទីតាំងស្ថិតនៅក្រៅពីរាជធានីភ្នំពេញ ខេត្តកណ្តាល និងខេត្តកំពង់ស្ពឺត្រូវដាក់ពាក្យស្នើសុំចាប់ពីថ្ងៃទី៩ ខែកក្កដា ដល់ថ្ងៃទី៣១ ខែសីហា ឆ្នាំ២០២៤។

រីឯមូលដ្ឋានសុខាភិបាលឯកជន ដែលបានចុះកិច្ចព្រមព្រៀងជាមួយ ប.ស.ស. តាមយន្តការដែលមានការឯកភាពពីនិយ័តករសន្តិសុខសង្គមរួចហើយ មិនតម្រូវឱ្យមានការដាក់ពាក្យស្នើសុំឡើងវិញទៀតទេ។ ការកំណត់កាលបរិច្ឆេទចុះកិច្ចព្រមព្រៀង គឺយកកាលបរិច្ឆេទដែលបានចុះហត្ថលេខា រវាងភាគីមូលដ្ឋានសុខាភិបាលឯកជន និង ប.ស.ស. សម្រាប់កំណត់សុពលភាពរយៈពេល៣ឆ្នាំ នៃកិច្ចព្រមព្រៀង។

បើតាមលោក ម៉េង ហុង ករណីមូលដ្ឋានសុខាភិបាលឯកជន ដែលបានចុះកិច្ចព្រមព្រៀងជាមួយ ប.ស.ស.រួចហើយ ដូចមានក្នុងចំណុច១ និងចំណុច២ខាងលើ ខកខានក្នុងការដាក់ពាក្យស្នើសុំចុះកិច្ចព្រមព្រៀងឡើងវិញតាមកាលបរិច្ឆេទចាត់ទុកថា បានបញ្ចប់កិច្ចព្រមព្រៀង ដោយស្វ័យប្រវត្តិ។

គិតត្រឹមឆ្នាំ២០២៣ ប.ស.ស.បានចុះកិច្ចព្រមព្រៀងជាមួយមូលដ្ឋានសុខាភិបាលសរុបចំនួន ១ ៥៣០មូលដ្ឋានសុខាភិបាល នៅទូទាំងប្រទេស ដែលក្នុងនោះមូលដ្ឋានសុខាភិបាលសាធារណៈ មានចំនួន ១ ៣៩៥ និងមូលដ្ឋានសុខាភិបាលឯកជន មានចំនួន ១៣៥មន្ទីរពេទ្យឯកជន៕