លោក សម រង្ស៊ី ទុកពេលឱ្យលោក ហ៊ុន សែន រយៈពេល ៣ខែ បើរដ្ឋាភិបាលក្រុងភ្នំពេញ មិនព្រមអនុវត្តកិច្ចព្រមព្រៀងសន្តិភាពទីក្រុងប៉ារីស លោកនឹងបង្កើតរដ្ឋាភិបាលក្រៅប្រទេស ទាមទារឱ្យអនុវត្ត

មេបក្សប្រឆាំងដ៏មានឥទ្ធិពល លោក សម រង្ស៊ី បានប្រកាសទុកពេលឱ្យប្រធានព្រឹទ្ធសភា និងជាប្រធានបក្សកាន់អំណាច លោក ហ៊ុន សែន រយៈពេល ៣ខែ ធ្វើយ៉ាងណាឱ្យរដ្ឋាភិបាលដឹកនាំដោយលោក ហ៊ុន ម៉ាណែត អនុវត្តកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដែលមាន១៨ប្រទេសជាហត្ថលេខី ដើម្បីដោះស្រាយជម្លោះព្រំដែនកម្ពុជា-ថៃ បើពុំដូច្នោះទេ លោកនឹងបង្កើតរដ្ឋាភិបាលក្រៅប្រទេសមួយ ដើម្បីទាមទារឱ្យអនុវត្តកិច្ចព្រមព្រៀងសន្តិភាពទីក្រុងប៉ារីស ព្រោះរដ្ឋាភិបាលនៃប្រទេសជាហត្ថលេខី មានសិទ្ធិស្នើឱ្យមានការអនុវត្តកិច្ចព្រមព្រៀងនេះ។

ថ្លែងក្នុងពិធីជួបជុំជាមួយអ្នកគាំទ្ររបស់លោកនៅប្រទេសបារាំងនាយប់ថ្ងៃទី១៧ ខែសីហា ម៉ោងនៅកម្ពុជា លោក សម រង្ស៊ី អតីតប្រធាននៃអតីតគណបក្សសង្គ្រោះជាតិ ថ្លែងថា៖«ចំពោះប្រទេសកម្ពុជា គឺត្រូវរដ្ឋាភិបាលទីក្រុងភ្នំពេញ រដ្ឋាភិបាលដឹកនាំដោយត្រកូល ហ៊ុន សែន តែខ្ញុំសូមប្រកាស ខ្ញុំឱ្យ ៣ខែទៀត បើរដ្ឋាភិបាលទីក្រុងភ្នំពេញដឹកនាំដោយត្រកូល ហ៊ុន សែន មិនព្រមស្នើក្នុងនាមប្រជារាស្ត្រខ្មែរ ឱ្យអនុវត្តកិច្ចព្រមព្រៀងទីក្រុងប៉ារីស យើងនឹងបង្កើតរដ្ឋាភិបាលក្រៅប្រទេសមួយ ដើម្បីទាមទារឱ្យអនុវត្តកិច្ចព្រមព្រៀងទីក្រុងប៉ារីស»។

លោក ជា ធីរិទ្ធ អ្នកនាំពាក្យគណបក្សកាន់អំណាច និងជាអ្នកនាំពាក្យលោក ហ៊ុន សែន ចាត់ទុកការលើកឡើងរបស់លោក សម រង្ស៊ី គឺគ្រាន់តែជាល្បែងនយោបាយដដែលៗរបស់គាត់ ដើម្បីទាញការចាប់អារម្មណ៍ ប៉ុន្តែទោះបីគាត់បង្កើតអ្វីក៏បង្កើតទៅ ក៏គ្មាប្រជាពលរដ្ឋចាប់អារម្មណ៍ដែរ។

លោកជា ធីរិទ្ធ ថ្លែងនាថ្ងៃទី១៨ សីហា ថា៖«គាត់ជាអ្នកនយោបាយជ្រុលនិយម អ៊ីចឹងយើងមិនចង់និយាយច្រើនក្នុងអំឡុងពេលនេះ។ យើងចង់សម្រួចគោលដៅរបស់យើងផ្តោតទៅលើសត្រូវឈ្លានពានរបស់យើងតែមួយមុខ។ ចំពោះសំឡេងរបស់គាត់លើកឡើងគ្រាន់តែស្រែកឱ្យតែបានតែប៉ុណ្ណឹង ដើម្បីឱ្យមានសំឡេងអ៊ីចឹងទៅ ស្រណុកគាត់រៃអង្គាសលុយបានខ្លះគ្រាន់ចាយនៅស្រុកបារាំង»៕