លោកនាយករដ្ឋមន្ត្រី ហ៊ុន ម៉ាណែត កំណត់យកខេត្តកំពង់ចាម ជាខេត្តទី១ ដែលត្រូវបញ្ចប់យុទ្ធនាការចុះបញ្ជីដីធ្លីជូនប្រជាពលរដ្ឋ ខណៈ២លានក្បាលដីក្នុងចំនួន៧លាន ត្រូវបានចុះបញ្ជីហើយ

លោកនាយករដ្ឋមន្ត្រី ហ៊ុន ម៉ាណែត បានប្រកាសកំណត់យកខេត្តកំពង់ចាម ជាខេត្តទី១ ក្នុងពេលឆាប់ៗខាងមុខនេះ ដែលនឹងត្រូវបញ្ចប់យុទ្ធនាការ នៃការចុះបញ្ចីដីធ្លីជាប្រព័ន្ធ ដើម្បីផ្តល់ជូនប្រជាពលរដ្ឋ នៅទូទាំងប្រទេស ខណៈដីចំនួន២លានក្បាលដី ក្នុងចំនួន៧លានក្បាលដី ត្រូវបានចុះបញ្ជីហើយ។

ការថ្លែងបែបនេះរបស់លោកនាយករដ្ឋមន្ត្រី ខណៈដែលលោកចូលរួមជាអធិបតី ក្នុងទិវាមច្ឆជាតិ ១ កក្កដា ដែលបានប្រារព្ធឡើងនៅខេត្តកំពង់ចាម នាថ្ងៃទី១ ខែកក្កដា ឆ្នាំ២០២៤ នេះ។

លោក ហ៊ុន ម៉ាណែត ថ្លែងថា៖«ការចុះយុទ្ធនាការចុះបញ្ចីដី គឺយើងធ្វើទូទាំងប្រទេស ហើយនៅខេត្តកំពង់ចាមនេះ នឹងទៅជាខេត្តទី១ ក្នុងពេលឆាប់ៗ ដើម្បីខ្ញុំប្រកាសក្នុងការបិទបញ្ចប់ការចុះបញ្ជីដីជាប្រព័ន្ធ ដើម្បីផ្តល់ជូនប្រជាពលរដ្ឋ»។

លោកបន្តថា៖«ខេត្ត ដែលដោះអស់មីន គឺមានច្រើន ដោះជាងពាក់កណ្តាលហើយ យើងបន្តដោះទៀត តែបិទបញ្ចប់ការចុះបញ្ចីដី ដើម្បីកាត់បន្ថយនូវទំនាស់ដី តាមរយៈនេះ គឺយើងនឹងផ្តល់ខេត្តកំពង់ចាមទី១។ យើងនៅសល់ប្រហែលខ្ទង់៥លានក្បាលដីទៀត ដែលត្រូវចុះបញ្ជី។ យើងទាំងអស់[មាន]៧លានក្បាលដីយើងធ្វើបានជាង២លាន ឥឡូវកំពុងឱ្យចាត់ចែង»។

លោកនាយករដ្ឋមន្ត្រី បន្ថែមថា ថ្ងៃមុន លោកឃើញមានការលើកគម្រោងថវិកាជិត១១០លានដុលា្លរស្នើសុំ ដើម្បីបញ្ចប់ក្នុងការចុះបញ្ជីក្បាលដីនេះ ដើម្បីធ្វើយ៉ាងណា ត្រូវកំណត់ដីរដ្ឋ ដីឯកជន ដោយចេញជាប្រព័ន្ធឱ្យហើយ ងាយស្រួលសម្រាប់ប្រជាពលរដ្ឋ ចៀសវាងកុំឱ្យមានទំនាស់ផ្សេងៗ៕