នាយករដ្ឋមន្ត្រីឥណ្ឌា នរេន្ទ្រៈ មោទី (Narendra Modi) បានអះអាងពីអាណត្តិទី៣ នៃការកាន់តំណែងរបស់លោកកាលពីម្សិលមិញ។ ប៉ុន្តែ លទ្ធផលបឋមបង្ហាញថា គណបក្សរបស់លោកឈ្នះបានតិចតួចជាងការរំពឹងទុក។ មហិទ្ធិឫទ្ធិនៅជុំវិញលោក មោទី បានបែកខ្ញែក។
លទ្ធផលនៃការបោះឆ្នោតបានបង្ហាញថា គណបក្សភារតិយ៉ា ជនតា (Bharatiya Janata Party) របស់លោក មោទី នៅតែទទួលបានអាសនៈសភាភាគច្រើន ប៉ុន្តែមិនគ្រប់គ្រាន់សម្រាប់សំឡេងភាគច្រើនទាំងស្រុងនោះទេ។ គណបក្សទំនងជាត្រូវការគណបក្សតូចៗនៅក្នុងសម្ព័ន្ធរបស់ខ្លួន ដើម្បីបង្កើតរដ្ឋាភិបាល។ លទ្ធផល បង្ហាញពីការធ្លាក់ចុះដ៏គួរឱ្យភ្ញាក់ផ្អើលសម្រាប់គណបក្សភរតិយ៉ា ជនតា។
គណបក្សសមាជជាតិឥណ្ឌា ដែលជាក្រុមប្រឆាំងដ៏ធំ បានទទួលលទ្ធផលល្អប្រសើរជាងការរំពឹងទុក។ គណបក្សនេះត្រូវបានមនុស្សជាច្រើនមើលឃើញថា បានដាំក្បាលចុះមិនអាចងើបរួច បន្ទាប់ពីបានទទួលរងការខាតបង់យ៉ាងច្រើនសន្ធឹកសន្ធាប់នៅក្នុងការបោះឆ្នោតពីរលើកកន្លងមក។ គណបក្សសមាជជាតិ និងសម្ព័ន្ធមិត្តបានបង្កើនសំឡេងគាំទ្ររបស់ពួកគេតទល់នឹងលោក មោទី ដោយការផ្តោតលើបញ្ហាមួយចំនួន ដូចជា ភាពគ្មានការងារធ្វើ យុត្តិធម៌សង្គម និងទំនាក់ទំនងរបស់នាយករដ្ឋមន្ត្រីជាមួយមហាសេដ្ឋីឥណ្ឌា។
លោក Modi នឹងក្លាយជាមេដឹកនាំឥណ្ឌាទីពីរ ដែលកាន់តំណែងជានាយករដ្ឋមន្ត្រីបីអាណត្តិជាប់គ្នា បន្ទាប់ពីលោក ចាវ៉ាហាឡាល់ នេហ៍រុ (Jawaharlal Nehru) ដែលជានាយករដ្ឋមន្ត្រីទីមួយ។ លោក មោទី បានហៅវាថាជា “ស្នាដៃដ៏ត្រចះត្រចង់នៅក្នុងប្រវត្តិសាស្ត្រនៃប្រទេសឥណ្ឌា” កាលពីម្សិលមិញ។
នៅពេលដែលលទ្ធផលកាន់តែច្បាស់ ទីផ្សារភាគហ៊ុនរបស់ប្រទេសឥណ្ឌាបានដាំក្បាលធ្លាក់ចុះយ៉ាងខ្លាំង។ នៅពេលបញ្ចប់ការជួញដូរកាលពីម្សិលមិញ ទីផ្សារហ៊ុនបានធ្លាក់ចុះចំនួន៦ ភាគរយ ដែលស្ទើរតែបានបោសសម្អាតប្រាក់ចំណេញទាំងអស់នៃឆ្នាំនេះ។ ប្រភព NYT