សម្ពាធកំពុងកើនឡើង ដើម្បីអនុញ្ញាតឱ្យប្រើអាវុធរបស់សហរដ្ឋអាមេរិក ក្នុងការវាយប្រហារលើប្រទេសរុស្ស៊ី

រដ្ឋមន្ត្រីការបរទេសសហរដ្ឋអាមេរិក លោក អែនថូនី ប្ល៊ិងខេន (Antony Blinken) បានលើកឡើងនៅថ្ងៃនេះថា រដ្ឋបាលរបស់លោកប្រធានាធិបតី ចូ បៃដិន អាចបើកចំហឱ្យមានការអត់ធ្មត់ចំពោះការវាយប្រហាររបស់យោធាអ៊ុយក្រែន នៅក្នុងប្រទេសរុស្ស៊ី ដោយប្រើអាវុធដែលផលិតដោយសហរដ្ឋអាមេរិក។ លោកបានមានប្រសាសន៍ថា សហរដ្ឋអាមេរិក ដែលបានជំទាស់នឹងការវាយប្រហារបែបនេះរហូតមកទល់ពេលនេះ នឹង “សម្រប និងកែតម្រូវ” ជំហររបស់ខ្លួន ឱ្យស្របទៅតាមលក្ខខណ្ឌសមរភូមិ។

មេដឹកនាំប្រទេសមួយចំនួននៅអឺរ៉ុបបានអំពាវនាវឱ្យប្រធានាធិបតី បៃដិន បញ្ឈប់ការដាក់កំហិតលើការវាយប្រហាររបស់អ៊ុយក្រែនទៅលើរុស្ស៊ី។ មេដឹកនាំទាំងនោះរួមមានលោក យ៉េនស៍ ស្តូលថិនប៊ើក (Jens Stoltenberg) អគ្គលេខាធិការនៃអង្គការណាតូ និងលោក អ៊ីម្ម៉ានូអ៊ែល ម៉ាក្រុង (Emmanuel Macron) ប្រធានាធិបតីនៃសាធារណរដ្ឋបារាំង។

លោក ប្ល៊ិងខេន បានថ្លែងមតិបែបនេះនៅទីក្រុងឈីស៊ីណូ (Chisinau) រដ្ឋធានីនៃប្រទេសម៉ុលដូវ៉ា ជាកន្លែងឈប់សម្រាកលើកដំបូងក្នុងដំណើរទស្សនកិច្ចមួយ ដែលមានគោលបំណងបង្ហាញការគាំទ្ររបស់សហរដ្ឋអាមេរិកចំពោះបណ្ដាប្រទេសដែលប្រឈមមុខនឹងប្រទេសរុស្ស៊ីដែលប្រទូសរ៉ាយ។

នៅសហរដ្ឋអាមេរិក រោងចក្រដែលកំពុងសាងសង់នៅរដ្ឋតិចសាស់នឹងផលិតគ្រាប់កាំភ្លើងអាទែ័រីចំនួន ៣០ ០០០គ្រាប់ក្នុងមួយខែៗ សម្រាប់កាំភ្លើងធំខ្នាត១៥៥មិល្លីម៉ែត្រ ដែលបានក្លាយជាកត្តាសំខាន់សម្រាប់កិច្ចប្រឹងប្រែងធ្វើសង្រ្គាមរបស់ទីក្រុងគីវ (Kyiv) ដែលប្រហែលនឹងកើនឡើងទ្វេដងនៃទិន្នផលរបស់សហរដ្ឋអាមេរិកនាពេលបច្ចុប្បន្ន។ ។ ញូ យ៉ក ថាយម៍