លោកថាក់ស៊ីន បានរួចទោសក្នុងសំណុំរឿងប្រមាថស្តេចថៃ ដោយតុលាការ ច្រានចោលសំណុំរឿងលើបទសម្ភាសន៍ជាមួយប្រព័ន្ធផ្សព្វផ្សាយ ខណៈភាគីថៃកំពុងមានជម្លោះព្រំដែនជាមួយកម្ពុជា

អតីតនាយករដ្ឋមន្ត្រីថៃ លោក Thaksin Shinawatra ដែលកំពុងមានជម្លោះយ៉ាងស្រួចស្រាល់ជាមួយនឹងប្រធានព្រឹទ្ធសភាកម្ពុជា លោក ហ៊ុន សែន ត្រូវបានតុលាការសម្រេចឱ្យរួចទោស នៅថ្ងៃទី២២ សីហា ពីក្នុងសំណុំរឿងប្រមាថព្រះមហាក្សត្រថៃ ដោយតុលាការព្រហ្មទណ្ឌ បានច្រានចោលសំណុំរឿងនេះ ដែលលោកបានសម្ភាសជាមួយប្រព័ន្ធផ្សព្វផ្សាយកូរ៉េ។

ការសម្រេចឱ្យលោក ថាក់ស៊ី ដែលកំពុងមានជម្លោះជាមួយមេដឹកនាំកម្ពុជា លោក ហ៊ុន សែន បានរួចផុតពីការជាប់ទោសនេះ ក្នុងគ្រាដែលភាគីថៃ ក៏កំពុងមានជម្លោះព្រំដែនជាមួយកម្ពុជា ដែលនេះបង្ហាញថា ប្រទេសថៃហាក់ដូចជាមានឯកភាពជាតិ និងសាមគ្គីភាពផ្ទៃក្នុងល្អ ខណៈកម្ពុជា ត្រូវបានគេមើលឃើញថា ហាក់ដូចជាមិនទាន់មានឯកភាពជាតិ រវាងបក្សកាន់អំណាច និងបក្សប្រឆាំង។

បើតាមប្រព័ន្ធផ្សព្វផ្សាយនានា សំណុំរឿងនេះត្រូវបានចោទប្រកាន់ ដោយផ្អែកលើបទសម្ភាសន៍ ដែលលោកថាក់ស៊ីន បានផ្តល់ឱ្យទូរទស្សន៍កូរ៉េ កាលពីឆ្នាំ២០១៥ ដែលក្នុងនោះ លោកត្រូវបានចោទប្រកាន់ថា បានបរិហារកេរ្តិ៍ និងប្រមាថស្ថាប័នព្រះមហាក្សត្រថៃ។ លោកថាក់ស៊ីន ដែលជាចុងចោទបានបដិសេធការចោទប្រកាន់ ហើយលោកក៏ត្រូវបានលើកលែង​ឱ្យរូចផុតពីទោសទណ្ឌ៕