ប្រធានគណបក្សជំនាន់ថ្មី លោក មាជ សុវណ្ណារ៉ា ត្រូបានតុលាការខេត្តរតនគិរី ចេញដីកាបង្គាប់ឱ្យអាជ្ញាធរមានសមត្ថកិច្ច ចាប់ខ្លួន ពីបទញុះញង់ឱ្យមានការរើសអើង នៅតំបន់អភិវឌ្ឍន៍ត្រីកោណ កម្ពុជា ឡាវ វៀតណាម (CLV)។ នេះបើតាមប្រភព ដែលសុំមិនបញ្ចេញឈ្មោះបញ្ជាក់ នៅថ្ងៃទី៣ កញ្ញានេះ។
លោក មាជ សុវណ្ណារ៉ា មិនអាចទាក់ទងសុំអត្ថាធិប្បាយបានទេ នៅថ្ងៃទី៣ កញ្ញា នេះ ប៉ុន្តែអ្នកនាំពាក្យគណបក្សជំនាន់ថ្មី លោក នួន សុភ័ក្រ្ត ប្រាប់ The Cambodia Now News (CNN) ថា លោកបានឮដំណឹងពីការចេញដីកាចាប់ខ្លួនប្រធានបក្សជំនាន់ថ្មីដែរ ប៉ុន្តែគណបក្សមិនទាន់បានទទួលដីកាទេ។ លោកសម្តែងនូវចម្ងល់ថា ករណីនេះបានកើតឡើងតាំងពីមុនលោក មាជ សុវណ្ណារ៉ា បង្កើតគណបក្ស តាមរយៈវីដេអូចាស់ ហេតុអ្វីបានទើបកម្រើកឡើងនៅពេលនេះទៅវិញ។
លោក នួន សុភ័ក្ត្រ ថ្លែងថា៖«[ដីកា] នៅថ្ងៃទី៨ ខែកញ្ញា ឆ្នាំ២០២៣ ពីបទចោទ ញុះញង់ និងបង្កឱ្យមានការរើសអើង។ ចំណុចនេះកើតឡើង ដោយសារវីដេអូចាស់ តាំងពីមុនលោកបង្កើតគណបក្សជំនាន់ថ្មីមកម្ល៉េះ។ អ៊ីចឹង ខាងគណបក្សមិនមានអីបកស្រាយច្រើនទេជុំវិញរឿងនេះ ដោយសារវាជាករណីចាស់»៕