ប្រទេសថៃ ត្រូវតែបញ្ឈប់ការបង្វែរប្រធានបទស្តីពីសន្តិភាពតាមបណ្តោយព្រំដែន ដែលជាបញ្ហាចម្បងនៅចំពោះមុខ ទៅជារឿងគ្រាប់មីន និងយុទ្ធភណ្ឌមិនទាន់ផ្ទុះ ដែលជាបញ្ហាបន្ទាប់បន្សំ

ក្នុងដំណើរទស្សនកិច្ចទៅកាន់ច្រកព្រំដែនអន្តរជាតិជាំ-សាង៉ាំ និងមជ្ឈមណ្ឌលសន្តិភាពអន្លង់វែង នៅថ្ងៃទី២៨ សីហា ប្រធានមជ្ឈមណ្ឌលឯកសារកម្ពុជា លោក ឆាំង យុ បានប្រាប់ទៅភាគីថៃ ថា ប្រទេសថៃ ត្រូវតែបញ្ឈប់ការបង្វែរស្ថានការណ៍ចេញពីប្រធានបទ ដំណោះស្រាយសន្តិភាព នៅតាមបណ្តោយព្រំដែន ដែលជាបញ្ហាចម្បងនៅចំពោះមុខ ទៅជារឿងគ្រាប់មីន និងយុទ្ធភណ្ឌមិនទាន់ផ្ទុះ ដែលជាបញ្ហាបន្ទាប់បន្សំ។

តាមរយៈសំណេរលើទំព័ហ្វេសប៊ុក Documentation Center of Cambodia នាថ្ងៃទី២៨ សីហា នេះ លោក ឆាំង យុ បញ្ជាក់ថា រាជរដ្ឋាភិបាលថៃបានបង្កើនការយកចិត្តទុកដាក់ទៅលើបញ្ហាគ្រាប់មីន និងយុទ្ធភណ្ឌមិនទាន់ផ្ទុះ នៅតាមបណ្ដោយព្រំដែន នេះគឺមិនមែនជារឿងខុសឆ្គងអ្វីទេ។ បញ្ហាគ្រាប់មីន និងយុទ្ធភណ្ឌមិនទាន់ផ្ទុះ គឺជាបញ្ហា ដែលកើតមានជាច្រើនទសវត្សរ៍កន្លងមក ហើយលោកបង្ហាញជំនឿថា ប្រជាជនកម្ពុជាយល់ស្របចំពោះគំនិត ថា អាវុធដ៏ស្ងប់ស្ងាត់ទាំងនេះ ដែលបន្សល់ទុកពីសង្គ្រាម បានសម្លាប់ ឬបង្កជាពិការភាពលើប្រជាជនស្លូតត្រង់រាប់ពាន់នាក់នៃប្រទេសទាំងពីរនៅសងខាងតាមព្រំដែន។

លោក ឆាំង យុ ប្រាប់ថៃថា៖«ទោះបីជាយ៉ាងណាក្តី ផ្អែកទៅលើស្ថានការណ៍នៅតាមបណ្ដោយព្រំដែននាពេលបច្ចុប្បន្ន បញ្ហាគ្រាប់មីន និងយុទ្ធភណ្ឌមិនទាន់ផ្ទុះ គឺមិនមែនជាបញ្ហាចម្បងបំផុត ដែលរារាំងដល់ដំណើរការសន្តិភាពនោះទេ។ ប្រទេសថៃត្រូវតែបញ្ឈប់ការបង្វែរប្រធានបទទៅរកបញ្ហាបន្ទាប់បន្សំ ហើយងាកមកផ្តោតទៅលើបញ្ហាចម្បងនៅចំពោះមុខវិញ គឺការប្តេជ្ញាចិត្តប្រកបដោយតម្លាភាព យ៉ាងស្មោះត្រង់ និងឥតលក្ខខណ្ឌ ដើម្បីសម្រេចបាននូវសន្តិភាពតាមបណ្តោយព្រំដែន»។

លោកបញ្ជាក់ថា គ្រាប់មីន និងយុទ្ធភណ្ឌមិនទាន់ផ្ទុះ គ្រាន់តែជាសមាសធាតុផ្សំមួយផ្នែក នៃបញ្ហាជាយុទ្ធសាស្ត្រនេះតែប៉ុណ្ណោះ ដែលប្រទេសទាំងពីរត្រូវធ្វើការរួមគ្នាក្នុងការដោះស្រាយ ហើយដំណោះស្រាយអាចដាក់ចេញបាន លុះត្រាតែមានភាពស្មោះត្រង់ តម្លាភាព និងការប្តេជ្ញាចិត្ត ដោយសុចរិត រវាងរាជរដ្ឋាភិបាល និងយោធានៃប្រទេសទាំងពីរ។ យោងតាមការសង្កេតការណ៍នៅមូលដ្ឋាននាពេលកន្លងមក យោធាថៃ ពុំបានធ្វើការរួមគ្នាជាធ្លុងមួយ ជាមួយនឹងរដ្ឋាភិបាលថៃនោះទេ៕