អ្នកសង្កេតការណ៍ចំនួន ៧ប្រទេស បានចេញទៅសង្កេតមើលទីតាំងជម្លោះជាក់ស្តែងនៅតាមព្រំដែនកម្ពុជា-ថៃ នៅខេត្តបាត់ដំបង ខេត្តបន្ទាយមានជ័យ និងខេត្តព្រះវិហារ

ក្រសួងការពារជាតិកម្ពុជា បានសម្របសម្រួលជូនអ្នកសង្កេតការណ៍អន្តរកាល(IOT) ដឹកនាំដោយអនុព័ន្ធយោធាម៉ាឡេស៊ីប្រចាំកម្ពុជា ដែលមានតំណាងមកពីប្រទេសចំនួន ៦ចូលរួម មានប៊្រុយណេ ឥណ្ឌូនេស៊ី ឡាវ មីយ៉ាន់ម៉ា ហ្វីលីពីន និងវៀតណាម ដែលមានសមាជិកសរុបចំនួន៧ប្រទេស បានចេញដំណើរទៅកាន់ទីតាំងជាក់ស្តែង ដើម្បីសង្កេតមើលស្ថានភាពសន្តិសុខតាមព្រំដែន ដែលប៉ះពាល់ផ្ទាល់ក្នុងអំឡុងពេលជម្លោះព្រំដែនកម្ពុជា-ថៃ។ នេះបើតាមអ្នកនាំពាក្យក្រសួងការពារជាតិ លោកស្រី ម៉ាលី សុជាតា បញ្ជាក់ក្នុងសន្និសីទសារព័ត៌មាននៅថ្ងៃទី១៤ សីហា នេះ។

ទិសដៅទី១ ដែលក្រុមអ្នកសង្កេតការណ៍ត្រូវទៅ គឺយោធភូមិភាគទី៥ ក្នុងខេត្តបាត់ដំបង ទី២ ខេត្តបន្ទាយមានជ័យ ទៅតាមច្រកអន្តរជាតិប៉ោយប៉ែត ច្រកអូរបីជាន់ ភូមិជោគជ័យ និងច្រកបឹងត្រកួន និងគោលដៅទី៣ ទៅសង្កេតមើលស្ថានភាពនៅច្រកអានសេះ ខេត្តព្រះវិហារ៕