ទាហានថៃ នៅតែបន្តរាយបន្លាលួសលើដីពលរដ្ឋ នៅភូមិជោគជ័យ ខណៈមេដឹកនាំកម្ពុជាស្វាគមន៍ចំពោះលទ្ធផលវិជ្ជមាននៃកិច្ចប្រជុំវិសាមញ្ញគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC)

កងទ័ពថៃ នៅតែបន្តរាយលួសបន្លាចូលដែនដីកម្ពុជា នៅភូមិ Nong Chan ជាប់នឹងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នៅរសៀលថ្ងៃទី២៥ ខែសីហា ឆ្នាំ២០២៥ បើទោះបីកិច្ចប្រជុំវិសាមញ្ញគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) ចេញលទ្ធផលល្អ ដែលមេដឹកនាំកម្ពុជា លោកនាយករដ្ឋមន្ត្រី ហ៊ុន ម៉ាណែត ទទួលស្វាគមន៍ក៏ដោយ។

លោក ហ៊ុន ម៉ាណែត បញ្ជាក់លើហ្វេសប៊ុករបស់លោកនារសៀលថ្ងៃទី២៥ សីហា ថា៖”ស្វាគមន៍ចំពោះលទ្ធផលវិជ្ជមាននៃកិច្ចប្រជុំវិសាមញ្ញគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ(RBC)រវាងយោធភូមិភាគទី៥កម្ពុជា និងបញ្ជាការដ្ឋានការពារព្រំដែនចាន់បុរី-ត្រាត ថៃ ថ្ងៃទី២៥ សីហា ឆ្នាំ២០២៥”។

ទោះយ៉ាងណា រដ្ឋបាលខេត្តបន្ទាយមានជ័យ បានធ្វើការជំទាស់ចំពោះភាគីថៃ ដែលលោកអភិបាលខេត្តស្រះកែវ ដែលសន្យាចេញប័ណ្ណកម្មសិទ្ធិជូនប្រជាពលរដ្ឋថៃ ដែលមានសិទ្ធិ នៅភូមិ Nong Chan ស្រុក Khok Sung ខេត្តស្រះកែវ ព្រោះសកម្មភាពនេះ រំលោភលើស្មារតីនៃ MOU ឆ្នាំ២០០០ រវាងរាជរដ្ឋាភិបាលនៃប្រទេសទាំងពីរ ជាពិសេសប៉ះពាល់ទៅដល់ ដំណើរការការងារចរចា និងខណ្ឌសីមារបស់គណៈកម្មការចម្រុះខណ្ឌសីមាព្រំដែនគោក (JBC) នៃប្រទេស ទាំងពីរ។

តាមរយៈលិខិតផ្ញើទៅអភិបាលខេត្តស្រះកែវ នៃភាគីថៃ លោក អ៊ុ រាត្រី អភិបាលខេត្តបន្ទាយមានជ័យ បញ្ជាក់ថា៖«ចំពោះការចេញប័ណ្ណកម្មសិទ្ធិជូនប្រជាពលរដ្ឋថៃ នៅលើទឹកដីថៃ គឺជាសិទ្ធិរបស់អាជ្ញាធរថៃ ប៉ុន្តែការចេញប័ណ្ណនេះមិនត្រូវធ្វើឱ្យប៉ះពាល់ដល់អធិបតេយ្យរបស់កម្ពុជា ឬប៉ះពាល់ដល់តំបន់ដែលគណៈកម្មការចម្រុះខណ្ឌសីមាព្រំដែនគោក (JBC) នៃប្រទេសទាំងពីរពុំទាន់បានឯកភាពខណ្ឌសីមានៅលើដីជាក់ស្តែង ឬប៉ះពាល់ដល់តំបន់ ដែលប្រជាពលរដ្ឋកម្ពុជាកំពុងកាន់កាប់ និងអាស្រ័យផលឡើយ៕