លោក សាយ រើន ជាសមាជិកក្រុមប្រក្សាខេត្តកំពង់ស្ពឺ មកពីគណបក្សឆន្ទៈខ្មែរ ត្រូវបានអាជ្ញាធរមានសមត្ថកិច្ចចាប់ខ្លួន នៅថ្ងៃទី១៤ ខែសីហា និងសកម្មជនលោកស្រី សែម សុផល មកពីគណបក្សប្រជាធិបតេយ្យមូលដ្ឋាន នៅសង្កាត់ព្រែកស្តី ក្រុងសំពៅពូន ខេត្តកណ្តាល ត្រូវបានចាប់ខ្លួន នៅថ្ងៃទី១៦ សីហា។
បើតាមសេចក្តីថ្លែងការណ៍របស់គណបក្សឆន្ទៈខ្មែរ នៅថ្ងៃទី១៦ ខែសីហា ការចាប់ខ្លួនលោក សាយ រើន គឺអនុវត្តតាមដីកាបង្គាប់ឱ្យនាំខ្លួនរបស់សាលាដំបូងខេត្តកំពង់ស្ពឺ ដោយមានតម្រុយពិរុទ្ធភាពពីបទផ្តើមគំនិតក្នុងអំពើញុះញង់ឱ្យមានការរើសអើង និងបទេផ្តើមគំនិតក្នុងអំពើប៉ុនប៉ងកំហែងយកមានស្ថានទម្ងន់ទោសទាក់ទងទៅនឹងជនរងគ្រោះ ប្រព្រឹត្តនៅឃុំពោធិអង្ក្រង ស្រុកបរសេដ្ឋ ខេត្តកំពង់ស្ពឺ កាលពីអំឡុងខែកក្កដា ឆ្នាំ២០២៤។
ទោះយ៉ាងណា គណបក្សឆន្ទៈខ្មែរ ចាត់ទុកការចាប់ខ្លួនលោក សាយ រើន គឺជារឿងនយោបាយ និងជាការគំរាមកំហែង និងការធ្វើទុក្ខបុកម្នេញមកលើសកម្មជនគណបក្សឆន្ទៈខ្មែរ ខណៈដែលលោក សាយ រើន គឺជាសមាជិកគណបក្សឆន្ទៈខ្មែរ ដ៏សកម្ម និងមានប្រជាប្រិយភាពនៅខេត្តកំពង់ស្ពឺ ដែលទើបបានជាប់ឆ្នោតជាសមាជិកក្រុមប្រឹក្សាខេត្ត។
សេចក្តីថ្លែងការណ៍បញ្ជាក់ថា៖«គណបក្សឆន្ទៈខ្មែរ សូមអំពាវនាវដល់សាលាដំបូងខេត្តកំពង់ស្ពឺ ទម្លាក់បទចោទប្រកាន់ និងដោះលែងលោក សាយ រើន ឱ្យមានសេរីភាពឡើងវិញ ដើម្បីលោកបានបន្តសកម្មភាពនយោបាយជាមួយគណបក្សឆន្ទៈខ្មែរ តទៅទៀតស្របតាមច្បាប់ស្តីពីគណបក្សនយោបាយនិងរដ្ឋធម្មនុញ្ញ នៃព្រះរាជាណាចក្រកម្ពុជា»។
ចំណែកអ្នកស្រី សែម សុផល ត្រូវបានសមត្ថកិច្ចចាប់ខ្លួននៅថ្ងៃទី១៦ សីហា ទាំងមិនដឹងមូលហេតុ។ នេះបើតាមសេចក្តីថ្លែងការណ៍នៅថ្ងៃទី១៦ សីហា។ គណបក្សប្រជាធិបតេយ្យមូលដ្ឋាន ដែលមានថ្នាក់ដឹកនាំ និងសមាជិក ព្រមទាំងក្រុមគ្រួសារមានការព្រួយបារម្ភយ៉ាងខ្លាំងចំពោះសុវត្ថិភាពអ្នកស្រី សែម សុផល ហើយការចាប់ខ្លួនអ្នកស្រី ក៏មិនទាន់បានដឹងថា សមត្ថកិច្ចចាប់ខ្លួនអ្នកស្រីពីបទអ្វីដែរ។
សេចក្តី្ថថ្លែងការណ៍៖«គណបក្សប្រជាធិបតេយ្យមូលដ្ឋាន សូមអំពាវនាវដល់អាជ្ញាធរពាក់ព័ន្ធ ដោះលែងអ្នកស្រី សែម សុផល ឱ្យមានសេរីភាពពេញលេញ ជាពិសេស សិទ្ធិពលរដ្ឋ និងសិទ្ធិនយោបាយជាដើម»។
ស្នងការនគរបាលខេត្តកណ្តាល លោក ឈឿន សុចិត្រ មិនអាចទាក់ទង សុំការបញ្ជាក់ពីមូលហេតុ នៃការចាប់ខ្លួនអ្នកស្រី សែម សុផល នៃគណបក្សប្រជាធិបតេយ្យមូលដ្ឋាន បានទេ នៅថ្ងៃទី១៧ សីហានេះ ដោយទូរស័ព្ទចូលមិនមានអ្នកទទួល៕