អតីតតំណាងរាស្ត្រនៃបក្សប្រឆាំង ភ្ញាក់ផ្អើលពេលឃើញឈ្មោះត្រូវបានតែងតាំងជាសមាជិកគណៈកម្មការ CLV ដោយមិនដឹងខ្លួន ដែលមន្ត្រីបក្សកាន់អំណាចថា ការមិនដឹងឮនេះ ជាសម្តីមិនស្មោះត្រង់

លោក ឡុង រី អតីតតំណាងរាស្ត្រ នៃអតីតគណបក្សសង្គ្រោះជាតិ នៅមណ្ឌលខេត្តក្រចេះ បានបង្ហាញការភ្ញាក់ផ្អើល នៅថ្ងៃទី១៦ ខែសីហា នៅពេលលោកឃើញឈ្មោះរបស់ខ្លួនត្រូវបានតែងតាំងជាសមាជិកគណៈកម្មការនៃគម្រោងអភិវឌ្ឍន៍តំបន់ត្រីកោណ កម្ពុជា ឡាវ វៀតណាម(CLV) ជាមួយសមាជិកមួយចំនួនទៀតរបស់គណបក្សប្រជាជនកម្ពុជា ដោយលោកថា មិនបានដឹងខ្លួនមុន។

អតីតតំណាងរាស្ត្ររូបនេះ បានសរសេរនៅលើទំព័រហ្វេសប៊ុករបស់ខ្លួនថា៖«ខ្ញុំមានការភ្ញាក់ផ្អើលមែនទែន ដោយឃើញឈ្មោះខ្ញុំត្រូវបានតែងតាំងជាសមាជិកគណៈកម្មការ CLV ទាំងដែលសាមីខ្លួនមិនដឹងអ្វីសោះ។ ខ្ញុំសូមជម្រាបថា បើពួកយើងបានដឹងរឿងនេះតាំងតែពីពេលនោះ ម៉្លេះសមផ្អើលយូរហើយ មិនចាំបាច់ដល់ថ្ងៃនេះទេ»។

លោក ឡុង រី បញ្ជាក់ថា៖«ព្រោះកាលនោះគណបក្សប្រឆាំងមានកម្លាំងពេញដៃ អាចចេញមុខបកអាក្រាតបំណងទុច្ចរិតមេដឹកនាំផ្តាច់ការបាន ដើម្បីឱ្យរាស្ត្រដឹងតាំងពីពេលនោះមកម៉្លេះ»។

ប៉ុន្តែតំណាងរាស្ត្រ និងជាប្រធានគណៈកម្មការកិច្ចការបរទេស លោក ឈាង វុន ប្រាប់ The Cambodia Now News(CNN) នៅថ្ងៃទី១៦ សីហា ថា ការបដិសេធរបស់លោក ឡុង រី ដែលថា ខ្លួនមិនបានដឹងអំពីឈ្មោះរបស់ខ្លួនត្រូវបានតែងតាំងជាសមាជិក CLV គឺមិនអាចបដិសេធកើតទេ ព្រោះលោកឡុង រី បានអង្គុយក្នុងសភាជាង២ឆ្នាំ ក្រោយត្រូវបានគេតែងតាំងគាត់។

លោក ឈាង វុន បញ្ជាក់ថា៖«រាល់ការតែងតាំងគេបញ្ជូនទៅឈ្មោះរៀងៗខ្លួន [និយាយ]ឱ្យស្មោះត្រង់។ គាត់ថា អីក៏បានដែរ ពិបាកជឿណាស់ពួកនេះឥឡូវ។ និយាយថា គាត់មិនដឹង មិនកើតទេ»។
លោក ឈាង វុន បន្តថា កាលនោះ លោក ឡុង រី នៅគណបក្សសម រង្ស៊ី ដែលមានសមាជិកសភា ចំនួន២៦រូប និងនៅគ្រប់គណៈកម្មការនៃរដ្ឋសភា ហើយឯកសារចាត់តាំងប៉ុន្មាន ត្រូវបានផ្ញើទៅគណៈកម្មការទាំងអស់ ហើយលោក ឡុង រី ត្រូវបានចាត់តាំងនៅក្នុងគណៈកម្មការ CLV ហ្នឹង។ ក្រោយពីនៅគណបក្សសម រង្ស៊ី ពួកគេបានបញ្ចូលជាមួយគណបក្សសិទ្ធិមនុស្ស បង្កើតគណបក្សសង្គ្រោះជាតិ។

លោក ឈាង វុន ថ្លែងថា៖«ហើយឯកសារគេចែកគ្រប់គ្នា គាត់និយាយថា គាត់មិនដឹង។ យើងមិនចេះធ្វើអីផ្តេសផ្តាសទេ បើគាត់មិនដឹង គាត់ចោលម្សៀតហើយ»។

បើតាម លោក ឈាង វុន គឺលោក ឡុង រី ត្រូវបានចាត់តាំងក្នុងគណៈកម្មការ CLV សម្រាប់អាណត្តិទី៤ នៃរដ្ឋសភា។ ប៉ុន្តែមកដល់អាណត្តិទី៥ នៃរដ្ឋសភា គណបក្សសង្គ្រោះជាតិ មានសមាជិក ៣រូបនៅក្នុងគណៈកម្មការ CLV ក្នុងចំណោមសមាជិកសភាចំនួន៥៥រូបនោះ៕