គយបំភ្លឺថា ការចុះបង្ក្រាប និងចាប់យកទូរស័ព្ទជាង ១ ០០០គ្រឿង ដោយសារទូរស័ព្ទទាំងនោះពុំមានបិទត្រាពន្ធគយ និងគ្មានឯកសារបញ្ជាក់ពីប្រភពស្របច្បាប់

ត្បូងឃ្មុំៈ ក្រោយពីមានការរិះគន់ខ្លាំងៗលើបណ្តាញសង្គម ក៏ដូចជាតាមប្រព័ន្ធផ្សព្វផ្សាយលើការចុះបង្ក្រាប និងចាប់យកទូរស័ព្ទ ដោយចោទថា មិនបានបង់ពន្ធត្រឹមត្រូវនៅខេត្តត្បូងឃ្មុំ កាលពីថ្ងៃទី៣០ ឧសភានោះមក អគ្គនាយកដ្ឋានគយ និងរដ្ឋាករកម្ពុជា(អគរ) បានបំភ្លឺថា ការចុះចាប់នេះ ដោយសារទូរស័ព្ទទាំងនោះមិនមានបិទត្រាពន្ធគយ និងគ្មានឯកសារបញ្ជាក់ពីប្រភពស្របច្បាប។

អនុលោមតាមមាត្រា ៨ នៃច្បាប់ស្តីពីគយជាធរមាន ព្រមទាំងប្រកាសចុះថ្ងៃទី២២ ខែឧសភា និងប្រកាសចុះថ្ងៃទី១១ ខែកញ្ញា ឆ្នាំ២០០៨ របស់ក្រសួងសេដ្ឋកិច្ចនិងហិរញ្ញវត្ថុ មុខទំនិញទូរស័ព្ទត្រូវបានចាត់ជាទំនិញកំណត់ពិសេស ដែលជាកម្មវត្ថុ នៃការបិទត្រាពន្ធគយ។ នេះបើយោងតាមសេចក្តីបំភ្លឺ របស់ អគរ នាថ្ងៃទី៣១ ឧសភា។

អគរ បញ្ជាក់ថា៖«ជាក់ស្តែង នាពេលចុះធ្វើអនុលោមភាពនៅតាមទីតាំងអាជីវកម្មដ្ឋានខាងលើ មន្ត្រីគយនិងរដ្ឋាករមានសមត្ថកិច្ចពិនិត្យឃើញថា មានទូរស័ព្ទស្មាតហ្វូនថ្មី ចំនួន ៣៥៦គ្រឿង និងទូរស័ព្ទប្រើរួច ចំនួន ៩៥៥គ្រឿង ពុំមានបិទត្រាគយ និងពុំមានឯកសារបញ្ជាក់ពីប្រភពស្របច្បាប»។

អគរ បន្ថែមថា ទូរស័ព្ទទាំងនោះត្រូវបាននាំយកមករក្សាទុកជាបណ្តោះអាសន្ន នៅទីតាំងឈរជើង របស់ការិយាល័យស្រាវជ្រាវ និងបង្ក្រាបអំពើរត់ពន្ធតំបន់៦ នៅឃុំក្រែក ស្រុកពញាក្រែក ខេត្តត្បូងឃ្មុំ ដើម្បីធ្វើកំណត់ហេតុល្មើសច្បាប់គយទៅតាមនីតិវិធី។ ចំពោះទូរស័ព្ទប្រើរួច ដែលត្រូវបានរកឃើញថា ជាទំនិញទិញដូរក្នុងស្រុកនោះ អង្គភាពគយ និងរដ្ឋាករមានសមត្ថកិច្ច នឹងប្រគល់ជូនម្ចាស់វិញ៕