អគ្គនាយករងគយ លោកកែវ សុខឃាង និងប្អូនប្រុស ដែលជាមន្ត្រីគយដែរត្រូវបានដកបញ្ឈរជើង សង្ស័យពាក់ព័ន្ធអំពើពុករលួយ និងផ្តល់ព័ត៌មានទៅខាងក្រៅ

លោក កែវ សុខឃាង អតីតមេគយចល័តល្បីល្បាញក្នុងស្រុកខ្មែរ បច្ចុប្បន្នជាអគ្គនាយករង នៃអគ្គនាយកដ្ឋានគយ និងរដ្ឋាករកម្ពុជា និងប្អូនប្រុសឈ្មោះកែវ អង្កាម ដែលជាមន្ត្រីគយដែរនោះត្រូវបានដកបញ្ឈរជើង ដោយសង្ស័យពាក់ព័ន្ធអំពើពុករលួយ និងផ្តល់ព័ត៌មានឱ្យទៅប្រភពក្រៅប្រទេស។ នេះបើតាមសេចក្តីរាយការណ៍ព័ត៌មានពីប្រភពផ្សេងៗនាប៉ុន្មានថ្ងៃនេះ។

បើតាមហ្វេសប៊ុកផេក ឈ្មោះ ផែង វណ្ណៈ និងបានអធិប្បាយច្បាស់ៗ ដោយលោក ផែង វណ្ណៈ នាថ្ងៃទី៣០ ឧសភា បានអះអាងថា លោក កែវ សុខឃាង អតីតមេគយចល័តប្រចាំស្រុកខ្មែរ កាលពីជាង១០ឆ្នាំមុន ព្រមទាំងប្អូន ឈ្មោះ កែវ អង្កាម ដែលជាមន្ត្រីគយដែរ ត្រូវបានថ្នាក់លើដកបញ្ឈរជើងហើយ ដោយសារតែអំពើលោភលន់ និងការប្រព្រឹត្តផ្តេសផ្តាស ក្នុងនាមខ្លួនជាមន្ត្រីរបស់រដ្ឋាភិបាល។

លោក ផែង វណ្ណៈ បញ្ជាក់ថា៖«នរណាមិនស្គាល់កែវ សុខឃាង! មេគយចល័ត។ ឥឡូវនេះ តាម¬ឮ ប៉ុន្មានថ្ងៃនេះបាក់ធ្មង់ ដោយសារតែអំពើលោភលន់របស់ខ្លួន។ កែវ សុខឃាង និងកែវ អង្កាមនេះ ត្រូវបានដកតំណែង»។

លោកវណ្ណៈបន្តេថា៖«កែវ សុខឃាង នេះ រាល់ថ្ងៃជាអគ្គនាយករងគយ ក៏ប៉ុន្តែ ដោយសារតែអំពើលោភលន់របស់គាត់ គាត់ធ្វើអំពើផ្តេសផ្តាស រហូតដល់ថ្នាក់លើដកហូតមុខតំណែង»។

អ្នកអធិប្បាយរូបនេះបន្ថែមថា រឿងកែវ សុខឃាងនេះ លោកមិននិយាយលម្អិតទេ គ្រាន់តែនិយាយអ្វី ដែលលោកបានដឹងរឿង ហើយដែលរឿងនោះ គឺមិនគួរកើតសោះ។

លោក ផែង វណ្ណៈ ថ្លែងថា៖«ខ្លួនឯងធ្វើការនៅក្នុងស្ថាប័នគយ ធ្លាប់ធ្វើមេគយចល័ត រហូតដល់ឡើងអគ្គរងគយ ធ្វើប្រធាននាយកដ្ឋានហូរហែមានទ្រព្យមហាសាល…ប៉ុន្តែក្រោយមកនេះកើតចិត្តលោភលន់ កាន់តែមាន កាន់តែលោភលន់ ធ្វើរឿងផ្តេសផ្តាស ដែលនរណា ក៏គេហួសចិត្តដែរ ឥឡូវគេដកហើយ»។

លោកបញ្ជាក់ថា៖«បើដកហើយ រឹបអូសទ្រព្យទៀត ចាប់ដាក់គុកទៀត។ អានេះអារកមាន់គំរាមស្វា។ មន្ត្រីធ្វើការពស់ក្បាលពីរនេះមិនគួរឱ្យមាននៅក្នុងស្ថានប័នជាតិទេ។ អ៊ីចឹង រឿងកែវ សុខឃាងនេះ ខ្ញុំគិតថា បើថ្នាក់លើគាត់ចាត់វិធានការតឹងតែង រឹបអូសទ្រព្យ អាហ្នឹងគឺល្អមែនទែន ព្រោះធ្វើហួសហេតុពេក។ លុយ! បើនិយាយពីលុយវិញ មិនដឹងចាយរបៀបម៉េចអស់ទេ។ ចាយអត់អស់ទេ ហើយមកធ្វើរឿងភ្លីភ្លើអ៊ីចឹង។ ខ្ញុំហួសចិត្ត»។

ទោះយ៉ាងណា មិនមានប្រភពណាដឹងថា លោក កែវ សុខឃាង មានទ្រព្យសម្បត្តិផ្ទះសម្បែងប៉ុន្មានកន្លែងទេ តាំងពីធ្វើជាមន្ត្រីគយធម្មតា រហូតក្លាយជាមន្ត្រីគយជាន់ខ្ពស់ប្រហែលជាង២០ឆ្នាំកន្លងទៅនេះ។ ប៉ុន្តែ មន្ត្រីគយមួយរូបធ្លាប់បានប្រាប់ថា គ្រាន់តែទីតាំងភូមិគ្រឹះមួយកន្លែងរបស់គាត់នៅជាប់ផ្លូវ២០០៤ ក៏មានតម្លៃខ្ទង់លានដុល្លារដែរ។ ប្រភពផ្សេងទៀត ក៏បានលើកឡើងថា បើនិយាយពីលុយ គឺ លោកកែវ សុខឃាង ចាយមិនអស់ទេ។

CNN នៅមិនទាន់អាចរកប្រភពទាក់ទងទៅលោក កែវ សុខឃាង ដើម្បីសុំការបំភ្លឺបានទេ។ ចំណែក លោក គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា ក៏មិនលើកទូរស័ព្ទ នារសៀលថ្ងៃទី៣១ ខែឧសភានេះ។

កាលពីល្ងាចថ្ងៃទី៣០ ឧសភា នៅពេលទាក់ទងសួរពីការដកមន្ត្រីគយ លោក កែវ សុខឃាង គឺលោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ មិនព្រមធ្វើអត្ថាធិប្បាយទេ ដោយប្រាប់ថា លោកកំពុងជាប់រវល់ប្រជុំ។ នៅរសៀលថ្ងៃទី៣១ ឧសភានេះទៀត CNN ក៏មិនអាចទាក់ទងលោកមាស សុខសេនសាន ដើម្បីសុំការបញ្ជាក់ពីរឿងនេះបានដែរ៕