លោកនាយករដ្ឋមន្ត្រី ហ៊ុន ម៉ាណែត សន្យារកដំណោះស្រាយជូនប្រជាពលរដ្ឋ ដែលចាញ់បោកក្រុមហ៊ុនរបស់អតីតឧកញ៉ា ឡេង ចាន់ណា

នាយករដ្ឋមន្ត្រីកម្ពុជា លោក ហ៊ុន ម៉ាណែត អះអាងថា រដ្ឋាភិបាល មិនព្រងើយកន្តើយក្នុងរឿងក្រុមហ៊ុនរបស់អតីតឧកញ៉ា ឡេង ចាន់ណា ដែលបានបោកប្រាស់ពលរដ្ឋអស់ខ្ទង់រយលានដុល្លារអាមេរិកនោះទេ ដោយលោកថ្លែងពេលជួបជាមួយប្រជាពលរដ្ឋខ្មែរនៅប្រទេសកូរ៉េ ក្នុងសប្តាហ៍នេះថា រដ្ឋាភិបាល​នៅតែរកវិធីរកប្រភពលុយនៅសល់ ដើម្បីដោះស្រាយជូនប្រជាពលរដ្ឋ។

លោក ហ៊ុន ម៉ាណែត បញ្ជាក់ថា៖«គោលដៅធំ នៅតែរកវិធីទាញមកយ៉ាងណារកប្រភព[លុយ]ទៅដល់ណា សល់ប៉ុន្មានអីប៉ុន្មាន យកមកដោះស្រាយជូនបងប្អូនទៅតាមលទ្ធភាព ដែលអាចធ្វើទៅបាន។ រដ្ឋមិនបានចូលរួមនៅពេលបងប្អូនវិនិយោគ តែរដ្ឋមានកាតព្វកិច្ច ព្រោះបងប្អូនជាប្រជាពលរដ្ឋខ្មែរ ត្រូវធ្វើយ៉ាងណា រកលទ្ធភាពប៉ុនណាជូនបងប្អូន។ មិនចោលទេ ខ្ញុំមិនមាត់ ខ្ញុំមិននិយាយ»៕