មន្ត្រីជាន់ខ្ពស់បក្សប្រឆាំងថាឈ្មោះថ្នាក់ដឹកនាំកំពូលៗនៃរដ្ឋាភិបាលនិរទេសមិនអាចប្រាប់បាន ដើម្បីសុវត្ថិភាព លើកលែងលោក សម រង្ស៊ី ខណៈលោក ហ៊ុន សែន ទាមទារឱ្យបង្ហាញឆាប់ៗ

លោក ម៉ែន សុថាវរិន្ទ មនុស្សសំខាន់ម្នាក់ស្ថិតក្នុងជួរថា្នក់ដឹកនាំរដ្ឋាភិបាលនៅក្រៅប្រទេស នៃក្រុមប្រឆាំង ដែលជាអតីតគណបក្សសង្គ្រោះជាតិថ្លែងនៅថ្ងៃទី៧ ធ្នូ ថា ឈ្មោះថ្នាក់ដឹកនាំកំពូលៗនៃរដ្ឋាភិបាលនិរទេស ឬរដ្ឋាភិបាលក្រៅប្រទេស មិនអាចត្រូវបញ្ចេញបានទេ ព្រោះដើម្បីរក្សាសុវត្ថិភាព លើកលែងតែលោក សម រង្ស៊ី ម្នាក់ប៉ុណ្ណោះ ដែលត្រូវបញ្ចេញឱ្យដឹងជាសាធារណៈតាមការចង់បានរបស់លោក ហ៊ុន សែន។

ការអះអាងបែបនេះ ក្រោយពីប្រធានព្រឹទ្ធសភា និងជាប្រធានគណបក្សប្រជាជនកម្ពុជា លោក ហ៊ុន សែន បានទាមទារឱ្យក្រុមប្រឆាំង បង្ហាញឈ្មោះថ្នាក់ដឹកនាំគណៈរដ្ឋមន្ត្រី នៃរដ្ឋាភិបាលនិរទេសរបស់លោក សម រង្ស៊ី ជាពិសេសឈ្មោះនាយករដ្ឋមន្ត្រី ឬក៏ប្រធានាធិបតី។

អតីតតំណាងរាស្ត្រ នៃអតីតគណបក្សប្រឆាំង លោក ម៉ែន សុថាវរិន្ទ ថ្លែងថា៖«នៅស្រុកខ្មែរ គឺអ្នកនៅជុំវិញលោក ហ៊ុន សែន ច្រើន គឺយើងមិនអាចបញ្ចេញបានទេ គេឱ្យចេញតែសម រង្ស៊ី មួយទេ ព្រោះនៅក្នុងស្រុកគេធ្វើការច្រើន។ នៅក្រៅស្រុកមានដូចគ្នា ប៉ុន្តែគ្រាន់តែថា លោក សម រង្ស៊ី តែម្នាក់ឯងទេ។ អ៊ីចឹង មិនអាចបញ្ចេញបានទេ បង្ខំចាប់ចំណាប់ខ្មាំង ធ្វើបាបគេ បងប្អូនគេ»។

លោកសុថាវរិន្ទ បញ្ជាក់ថា៖«ព្រោះគាត់ [លោក ហ៊ុន សែន] ដឹង គាត់ធ្វើបាបគេ។ គាត់ដាក់គេជាភេរវករឯណាអស់ឥឡូវហើយ។ អ៊ីចឹងអត់ទេ គឺចេញតែសម រង្ស៊ី មួយទេ គាត់ធ្វើតែអាហ្នឹងមួយ អ្នកទាំងអស់ហ្នឹងគេស្តាប់បញ្ជាសម រង្ស៊ី»។

អតីតតំណាងរាស្ត្ររូបនេះអះអាងថា រដ្ឋាភិបាល ដែលបង្កើតឡើង ដោយលោក សម រង្ស៊ី នៅក្រៅប្រទេសនេះ គឺដាច់ខាតត្រូវតែបង្កើតហើយ ព្រោះសំណូមពរអន្តរជាតិ ឬលោកសេរី គឺគេចង់បានឱ្យលោក ហ៊ុន សែន គោរពកិច្ចព្រមព្រៀងទីក្រុងប៉ារីស ដោយឱ្យសង្គមស៊ីវិល និងគណបក្សសង្គ្រោះជាតិត្រឡប់ទៅវិញ ហើយដោះលែងអ្នកនយោបាយ និងសកម្មជនបរិស្ថានទាំងអស់ ដូចដែលអឺរ៉ុបចង់បាននោះ គឺរដ្ឋាភិបាលនិទេស នឹងមិនត្រូវបានបង្កើតទេ។

លោក ម៉ែន សុថាវរិន្ទ បញ្ជាក់ថា៖«បើថា បើអត់[ព្រម]ទេ អ៊ីចឹងត្រូវតែដណ្តើមយកកៅអីនៅអង្គការសហប្រជាជាតិហើយ»។

ក្នុងកិច្ចប្រជុំព្រឹទ្ធសភា កាលពីថ្ងៃទី៥ ធ្នូ ឆ្នាំ២០២៤ លោក ហ៊ុន សែន បានថ្លែងថា៖«ខ្ញុំចង់ថា ឱ្យវាប្រកាសគណៈរដ្ឋមន្ត្រី ឱ្យបានលឿនមក តែវាមិនព្រមចេញឈ្មោះអាណាធ្វើនាយករដ្ឋមន្ត្រី អាណាធ្វើឧប[នាយករដ្ឋមន្ត្រី] អាណាធ្វើរដ្ឋមន្រ្តី នឹងអាលចេញច្បាប់មួយគ្រឹប។ ប៉ុន្តែវាមិនហ៊ានប្រកាសទេ បើវាហ៊ានចេញប្រធានាធិបតី បានសេចក្តីថា ហែងកំពុងប្រឆាំងនឹងរបបរាជានិយម ព្រោះហែងបង្កើតរដ្ឋាភិបាលមួយ ដែលមានប្រធានាធិបតី»។

លោក ហ៊ុន សែន សង្កត់ធ្ងន់ថា៖«ហែងដាក់ចេញមក តែវាមិនព្រមដាក់មកនៀក។ វានៅផ្ការីក អាហ្នឹងផ្ការីកផ្ការោយ បម្រុងធ្វើអីហ្នឹង ផ្ការីកផ្ការោយហ្នឹង»៕