ស្ថាបនិកសាកលវិទ្យាល័យមួយ ដែលធ្លាប់ត្រូវបានបញ្ចប់តំណែង ត្រូវបានតែងតាំងជារដ្ឋលេខាធិការផ្នែកកិច្ចការព្រំដែន ក្រោយប្រកាសគាំទ្រសាររបស់លោក ហ៊ុន សែន លើគម្រោងអភិវឌ្ឍន៍តំបន់(CLV)

លោក សៀន សុវណ្ណា ជាស្ថាបនិក និងជាប្រធានក្រុមប្រឹក្សាភិបាល នៃសាកលវិទ្យាល័យ សៅស៍អ៊ីសថ៍ អេយសៀ(University of South-East Asia)នៅខេត្តសៀមរាប។ លោកត្រូវបានតែងតាំងជារដ្ឋលេខាធិការ នៃរដ្ឋលេខាធិការដ្ឋានកិច្ចការព្រំដែន។ ការតែងតាំងនេះ បានធ្វើឡើង ក្រោយពីលោកចេញញត្តិភ្ជាប់និស្សិត ប្រកាសគាំទ្រសារប្រធានព្រឹទ្ធសភា លោក ហ៊ុន សែន លើតំបន់អភិវឌ្ឍន៍ CLV។ កាលពីថ្ងៃទី២ កក្កដា ឆ្នាំ២០២០ លោក សៀន សុវណ្ណា មានឋានន្តរស័ក្តិឧត្តមសេនីយ៍ឯក ផ្កាយ៣ ត្រូវបានអតីតនាយករដ្ឋមន្ត្រី លោក ហ៊ុន សែន បញ្ចប់តំណែងពីអគ្គនាយករង នៃអគ្គនាយកដ្ឋានសវនកម្មផ្ទៃក្នុង នៃក្រសួងមហាផ្ទៃ។

បន្ទាប់មក នៅថ្ងៃទី៣០ ខែកញ្ញា ឆ្នាំ២០២០ ឧត្តមសេនីយ៍ឯក សៀន សុវណ្ណា ត្រូវបានព្រះមហាក្សត្រ ត្រាស់បង្គាប់បន្ថយឋានន្តរស័ក្តិ ពីឧត្តមសេនីយ៍ឯក ផ្កាយ៣ មកនៅត្រឹមឧត្តមសេនីយ៍ត្រី ផ្កាយ១វិញ ក្នុងក្របខ័ណ្ឌមន្ត្រីនគរបាលជាតិកម្ពុជា នៃក្រសួងមហាផ្ទៃ។

កាលពីថ្ងៃទី២៣ ខែកក្កដា ឆ្នាំ២០២៤ លោក ហ៊ុន សែន បានថ្លែងសារពិសេស ឆ្លើយតបទៅអ្នករិះគន់ លើគម្រោងអភិវឌ្ឍន៍តំបន់ត្រីកោណ CLV ដោយលោកបានច្រានចោលការចោទប្រកាន់ថា គម្រោងនេះធ្វើឱ្យបាត់បង់ទឹកដី ៤ខេត្ត គឺ ខេត្តក្រចេះ ស្ទឹងត្រែង មណ្ឌលគិរី និងរតនគិរី ទៅវៀតណាម។ លោក ហ៊ុន សែន ក៏បានព្រមានចាត់វិធានការផ្លូវច្បាប់ទៅលើបុគ្គលណាក៏ដោយ ដែលនៅតែចោទប្រកាន់រដ្ឋាភិបាលកម្ពុជា ធ្វើឱ្យបាត់បង់ទឹកដីនៃខេត្តទាំ៤នេះទៅវៀតណាម។

ក្រោយពីលោក ហ៊ុន សែន ថ្លែងសាររឿង CLV បាន ២ថ្ងៃ នៅថ្ងៃទី២៥ កក្កដា លោក សៀន សុវណ្ណា បានចេញញត្តិ ដោយបានភ្ជាប់និស្សិតផង ប្រកាសគាំទ្រសាររបស់លោក ហ៊ុន សែន ហើយប្រកាសថ្កោលទោសចំពោះជនទាំងឡាយណា ដែលញុះញង់ និងបំភ្លៃការពិតថា កិច្ចសហប្រតិបត្តិការ ធ្វើឱ្យបាត់បង់ទឹកដី។

ញត្តិគាំទ្ររបស់ លោក សៀន សុវណ្ណា បានបញ្ជាក់ថា៖«យើងខ្ញុំទាំងអស់គ្នាជាគណៈគ្រប់គ្រង បុគ្គលិក សាស្ត្រាចារ្យ និងនិស្សិត នៃសាកលវិទ្យាល័យសៅស៍អ៊ីសថ៍អេយសៀ សូមប្រកាសគាំទ្រយ៉ាងពេញទំហឹងចំពោះសារពិសេសរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា នៅថ្ងៃទី២៣ ខែកក្កដា ឆ្នាំ២០២៤ ពាក់ព័ន្ធនឹងកិច្ចសហប្រតិបត្តិការអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម (CLV-DTA) ហើយថ្កោលទោសចំពោះជនទាំងឡាយណា ដែលញុះញង់ និងបំភ្លៃការពិតថា កិច្ចសហប្រតិបត្តិការនេះ ធ្វើឱ្យបាត់បង់ទឹកដី»។

ញត្តិគាំទ្របានបន្តថា៖«យើងខ្ញុំទាំងអស់គ្នាយល់ឃើញថា កិច្ចសហប្រតិបត្តិការអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម (CLV-DTA) គឺជាគំនិតផ្តួចផ្តើមដំបូងរបស់កម្ពុជា ក្នុងឆ្នាំ១៩៩៩ ដែលពេលនោះមាន សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ក្នុងគោលបំណងជំរុញសមាហរណកម្មខេត្តជាប់ព្រំដែន នៃប្រទេសទាំងបី កម្ពុជា ឡាវ វៀតណាម ដោយធ្វើយ៉ាងណាប្រែក្លាយព្រំដែននេះទៅជាព្រំដែនសន្តិភាព សាមគ្គីភាព និងការអភិវឌ្ឍ»។

ជុំវិញការភ្ជាប់និស្សិតក្នុងញត្តិគាំទ្រនេះ បើតាមសេចក្តីរាយការណ៍របស់សារព័ត៌មានមួយ ថា ក្រុមនិស្សិត ដែលត្រូវបានលោក សៀន សុវណ្ណា ភ្ជាប់ជាមួយនឹងញត្តិគាំទ្ររបស់ខ្លួននេះ និស្សិតមួយចំនួនមិនពេញចិត្តនឹងការមានឈ្មោះនៅក្នុងញត្តិនោះទេ ដោយថា សាកលវិទ្យាល័យ មិនបានស្ទង់មតិ ឬក៏សួរពីទឹកចិត្តរបស់ពួកគេ ហើយពួកគេក៏មិនបានដឹងមុនដែរ។

The Cambodia Now News (CNN) មិនទាន់អាចទាក់ទងលោក សៀន សុវណ្ណា ស្ថាបនិក នៃសាកលវិទ្យាល័យ សៅស៍អ៊ីសថ៍ អេយសៀ ដើម្បីសុំធ្វើអត្ថាធិប្បាយ ជុំវិញញត្តិ ដែលមានភ្ជាប់និស្សិតឱ្យគាំទ្រសារស្តីពី CLV នេះ បាននៅឡើយទេ នៅថ្ងៃទី១ ខែសីហា នេះ៕