World Bank ថា សេដ្ឋកិច្ចកម្ពុជាមានការកើនឡើងក្នុងត្រីមាសទី១ នៅឆ្នាំនេះ ខណៈវិស័យទីផ្សារអចលនទ្រព្យនៅតែបន្តធ្លាក់ចុះ

សកម្មភាពសេដ្ឋកិច្ចកម្ពុជា បានកើនឡើងនៅក្នុងត្រីមាសទី១ នៅឆ្នាំ២០២៤ ដោយសារតែការងើបឡើងវិញ នៃវិស័យសេវាកម្ម និងការនាំចេញទំនិញ ទោះបីជាតម្រូវការក្នុងស្រុកបានធ្លាក់ចុះក៏ដោយ។ ទោះយ៉ាងណា វិស័យទីផ្សារអចលនទ្រព្យ នៅតែបន្តធ្លាក់ចុះ។ នេះបើយោងតាមរបាយការណ៍បច្ចុប្បន្នភាពសេដ្ឋកិច្ចកម្ពុជារបស់ធនាគារពិភពលោកនៅថ្ងៃនេះ។

របាយការណ៍បានបញ្ជាក់ថា កំណើនសេដ្ឋកិច្ចត្រូវបានគេរំពឹងថា នឹងប្រសើរឡើងបន្តិច ពីកម្រិត ៥,៦% ក្នុងឆ្នាំ២០២៣ ទៅ ៥,៨% នៅឆ្នាំ២០២៤ ហើយនឹងអាចប្រសើរឡើងបន្ថែមទៀតនៅកម្រិត ៦,១% នៅឆ្នាំ២០២៥ និង ៦,៤% នៅឆ្នាំ២០២៦ ដោយសារមានភាពប្រសើរឡើងវិញលើការនាំចេញវិស័យកាត់ដេរ ទំនិញធ្វើដំណើរ និងស្បែកជើង រួមទាំងការងើបឡើងវិញ នៃការមកដល់របស់ភ្ញៀវទេសចរ។

លោកស្រី ម៉ារីយ៉ាម សាលីម ប្រធានគ្រប់គ្រងធនាគារពិភពលោកប្រចាំកម្ពុជា បានមានប្រសាសន៍ថា៖«ដើម្បីរក្សាកំណើនសេដ្ឋកិច្ចបន្ត កម្ពុជាត្រូវរក្សាស្ថិរភាពម៉ាក្រូហិរញ្ញវត្ថុ ដោយការស្តារឡើងវិញនូវលំហសារពើរពន្ធ និងការការពារវិស័យហិរញ្ញវត្ថុរបស់ខ្លួន»។

លោកស្រីបន្តថា៖«កម្ពុជា អាចពង្រឹង[ការប្រកួតប្រជែង]របស់ខ្លួនតាមរយៈការកែលម្អបរិយាកាសធុរកិច្ច សម្រួលនីតិវិធីពាណិជ្ជកម្ម នៅតាមព្រំដែន ធ្វើឱ្យការផ្គត់ផ្គង់ថាមពល កាន់តែអាចទុកចិត្តបាន និងពង្រឹងវិស័យអប់រំ»។

ការមកដល់របស់ភ្ញៀវទេសចរអន្តរជាតិ មានការប្រសើរឡើងនៅក្នុងត្រីមាសទី១ ដែលឈានដល់កម្រិត៨៤% នៃការមកដល់មុនពេលមានជំងឺរាតត្បាតកូវីដ១៩។ ការនាំចេញសម្លៀកបំពាក់ ទំនិញធ្វើដំណើរ និងស្បែកជើង បានស្ទុះងើបឡើងវិញ ខណៈដែលការនាំចេញទំនិញមិនមែនសម្លៀកបំពាក់ ជាពិសេស ទំនិញកសិកម្ម នៅតែមានភាពធន់ល្អ។ នេះបើតាមរបាយការណ៍ដដែល។
របាយការណ៍នេះបានបញ្ជាក់ថា សមាគមប្រជាជាតិអាស៊ីអាគ្នេយ៍ ឬអាស៊ាន បានក្លាយជាទីផ្សារនាំចេញធំទី២ របស់កម្ពុជា បន្ទាប់ពីសហរដ្ឋអាមេរិក។ ការកើនឡើង នៃការវិនិយោគពីបរទេសក្នុងវិស័យផលិតកម្ម និងកសិកម្ម ក៏បានចូលរួមចំណែកដល់ការងើបឡើងវិញនេះផងដែរ។ អតិផរណាបានធ្លាក់ចុះដល់សូន្យក្នុងខែមីនា ដោយសារតម្លៃម្ហូបអាហារ បានធ្លាក់ចុះ ខណៈដែលគណនីចរន្តបានកត់ត្រានូវអតិរេក ដែលមិនធ្លាប់មានពីមុនមកក្នុងឆ្នាំ២០២៣ ដោយសារឱនភាពពាណិជ្ជកម្មរួមតូច និងការកើនឡើង នៃភ្ញៀវទេសចរ។

ទោះជាយ៉ាងណាក៏ដោយ ក៏សកម្មភាពក្នុងវិស័យសំណង់នៅតែមានតិចតួច ខណៈដែលទីផ្សារអចលនទ្រព្យនៅតែបន្តធ្លាក់ចុះ។ ជាលទ្ធផល កំណើនឥណទានក្នុងស្រុកបានធ្លាក់ចុះយ៉ាងខ្លាំង បណ្តាលឱ្យមានការកាត់បន្ថយការចំណាយឯកជន និងប៉ះពាល់ដល់ការប្រមូលចំណូលក្នុងស្រុក។

ក្នុងរបាយការណ៍បច្ចុប្បន្នភាពសេដ្ឋកិច្ចវគ្គនេះ មានផ្នែកមួយផ្តោតពិសេសទៅលើការពិនិត្យមើលរបៀប ដែលកម្ពុជាអាចពង្រឹងប្រព័ន្ធអប់រំរបស់ខ្លួន ដើម្បីបង្កើនពលកម្ម ដែលមានជំនាញ និងបង្កើនផលិតភាព។ របាយការណ៍នេះក៏បានផ្តល់អនុសាសន៍ ដូចជា៖ បង្កើនការវិនិយោគលើការអប់រំកុមារតូច និងនៅបឋមសិក្សាលើកកម្ពស់ប្រសិទ្ធភាពគ្រូបង្រៀន និងធ្វើឱ្យការបែងចែកធនធានកាន់តែមានសមធម៌។

អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន មិនអាចទាក់ទងសុំអត្ថាធិប្បាយពាក់ព័ន្ធនឹងរបាយការណ៍របស់ធនាគារពិភពលោកនេះបានទេ នៅថ្ងៃទី៦ មិថុនានេះ៕