លោកឡៅ ម៉ុងហៃ៖ ពលរដ្ឋមានសិទ្ធិចូលរួមសកម្មក្នុងជីវភាពសេដ្ឋកិច្ច នយោបាយ វប្បធម៌ សង្គមកិច្ចរបស់ប្រទេសជាតិ

ក្នុងកាលៈទេសៈដ៏លំបាកមួយ ប្រជាពលរដ្ឋសុខចិត្តក្លាយខ្លួនទៅជាសកម្មជននយោបាយ។សកម្មជនរបស់គណបក្សនយោបាយ មានន័យថាប្រើប្រាស់សិទ្ធិជាពលរដ្ឋ សិទ្ធិនយោបាយ និងសិទ្ធិបង្កើតគណបក្ស។ នេះជាការលើកឡើងរបស់លោក ព្រឹទ្ធាចារ្យ ឡៅ ម៉ុងហៃ ជាអតីតអ្នកវិភាគសង្គម ក្នុងពិធីសមាជគណបក្សជំនាន់ថ្មី។

ជាព្រឹទ្ធាចារ្យ ដែលមានបទពិសោធន៍ផ្នែកសង្គម និងបានចូលរួមក្នុងសមាជដែលមានអ្នកចូលរួមរាប់រយនាក់ កាលពីថ្ងៃទី៤ ខែមិថុនា ឆ្នាំ២០២៤ នៅខេត្តសៀមរាប លោក ឡៅ ម៉ុងហៃ បានថ្លែងថា ក្នុងកាលៈទេសៈនេះបងប្អូនទាំងអស់សុខចិត្តក្លាយខ្លួនជាសកម្មជននយោបាយ សកម្មជនរបស់គណបក្សនយោបាយ និងប្រើសិទ្ធិបង្កើតគណបក្ស។

គណបក្សជំនាន់ថ្មីជាគណបក្ស ដែលតាំងខ្លួនជាបក្សប្រឆាំងមួយក្នុងចំណោមគណបក្សប្រឆាំងចំនួន៤ទៀត គឺអតីតគណបក្សសង្គ្រោះជាតិ គណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជា។ អ្វីដែលទាញចំណាប់អារម្មណ៍មជ្ឈដ្ឋានជាតិ និងអន្តរជាតិខ្លាំងនោះ គឺប្រធានគណបក្សជំនាន់ថ្មី លោកមាជ សុវណ្ណរ៉ា ជាអតីតអ្នកទោសនយោបាយនៃគណបក្សសង្គ្រោះជាតិផងដែរ។

លោក ឡៅ ម៉ុងហៃ ថ្លែងថា ប្រជាពលរដ្ឋនៅតែប្រើប្រាស់សិទ្ធិចូលរួមយ៉ាងសកម្មក្នុងជីវភាពសេដ្ឋកិច្ច នយោបាយ វប្បធម៌ សង្គមកិច្ចរបស់ប្រទេសជាតិ។ បើគេនិយាយទៅដល់សិទ្ធិក៏ប្រហែលជាស្ថិតក្នុងការគិតផងដែរ ជាពិសេសយុវជនហើយពួកគាត់មិនសប្បាយចិត្តនឹងសង្គមបច្ចុប្បន្ន។ បើពួកគាត់ពេញចិត្តនឹងសង្គមបច្ចុប្បន្ន គឺពួកគាត់មិនបាច់ធ្វើនយោបាយទេ។

លោកម៉ុងហៃ បន្ថែមថា៖«គេធ្វើនយោបាយដោយសារគេមានគំនិតរបស់គេជាចក្ខុវិស័យមួយ ទី១ គេមិនសប្បាយចិត្តនឹងសង្គមសព្វថ្ងៃ។ទី២ សង្គមសព្វថ្ងៃមិនប្រសើរជាងបញ្ញវន្តទេ មានន័យថា តាមរយៈការងារសកម្មរបស់គេហ្នឹងហើយគេអាចកសាងសង្គមមួយ ដែលល្អប្រសើរជាងសព្វថ្ងៃ»។

សមាជិកចូលរួមសមាជម្នាក់មកពីស្រុកព្រះស្តេច ខេត្តព្រៃវែង បាននិយាយថា លោកមានវ័យ៧១ឆ្នាំ តែលោកនៅតែមានចិត្តស្រឡាញ់ប្រជាធិបតេយ្យ ស្រឡាញ់សង្គមជាតិ និងចង់ចូលរួមធ្វើនយោបាយ។ ការចូលរួមនេះមានតែតាមរយៈចូលជាសមាជិក[បក្សជំនាន់ថ្មី]។ បើប្រទេសមួយមានតែគណបក្សមួយកាន់អំណាចតែឯង គឺមានន័យថា គណបក្សនោះហាក់ដូចជាជិះសេះលែងដៃដូច្នោះដែរ។

លោកឱ្យដឹងថា៖«ខ្ញុំសម្រេចចិត្តចូលរួមជាមួយគណបក្សជំនាន់ថ្មីនេះ ក៏ចង់ឱ្យក្មេងៗជំនាន់ក្រោយៗមើលគំរូតាម និងចេះចូលរួមធ្វើនយោបាយដូចខ្ញុំ។ ក្មេងៗចេះធ្វើនយោបាយសម្រាប់សង្គមសម្រាប់ជាតិយើងទៅថ្ងៃខាងមុខ»។

និស្សិតអាយុ២៥ឆ្នាំ១រូបសុំមិនឱ្យបញ្ចេញឈ្មោះដែលស្ថិតក្នុងពិធីសមាជគណបក្សជំនាន់ថ្មីដែរបានសម្តែងចំណាប់អារម្មណ៍ថា គណបក្សជំនាន់ថ្មីនេះមានលោកមាជ សុវណ្ណរ៉ា ជាប្រធានបក្សហើយលោកមាជ សុវណ្ណរ៉ា គឺជាមនុស្សដែលលោកចាត់ទុកថា ជាអ្នកប្រជាធិបតេយ្យ១រូបដែរ។ហេតុដូច្នេះប្រសិនបើមានអ្នកប្រជាធិបតេយ្យពិតប្រាកដជាអ្នកដឹកនាំបក្ស គឺលោកត្រូវតែចូលរួម។

លោកបន្តថា៖«យើងជាយុវជនត្រូវតែចេះឈឺឆ្អាលប្រទេសជាតិយើង។ បើយើងឃើញប្រទេសជួបបញ្ហាហើយ យើងមិនរួមគ្នាដោះស្រាយ តើឱ្យនរណាមកដោះស្រាយជំនួសយើង»៕

ដោយសុ ភាព