អាជ្ញាធរអ៊ីរ៉ង់មានបំណងរៀបចំសណ្តាប់ធ្នាប់ និងការគ្រប់គ្រង បន្ទាប់ពីប្រធានាធិបតី អ៊ីប្រាហ៊ីម រ៉ៃស៊ី (Ebrahim Raisi) និងរដ្ឋមន្ត្រីការបរទេស លោក ហ៊ូសេន អាមៀរ អាប់ឌុលឡាហ៊ីនអាន (Hossein Amir Abdollahian) បានស្លាប់ក្នុងការធ្លាក់ឧទ្ធម្ភាគចក្រ។
មេដឹកនាំកំពូល លោក អាយ៉ាតូលា អាលី ខាំមេនី (Ayatollah Ali Khamenei) មានប្រសាសន៍ថា អនុប្រធានាធិបតីទី១ លោក ម៉ូហាម៉ាត់ មុកបេរ៍ (Mohammad Mokhber) នឹងឡើងកាន់តំណែងជាប្រធានាធិបតីស្តីទី និងត្រូវរៀបចំការបោះឆ្នោតក្នុងរយៈពេល៥០ថ្ងៃក្រោយ។
ការស្លាប់របស់រ៉ៃស៊ីមិនត្រឹមតែកំណត់ដំណាក់កាលសម្រាប់ការបោះឆ្នោតប្រធានាធិបតីថ្មីប៉ុណ្ណោះទេ ប៉ុន្តែថែមទាំងបើកជំពូកថ្មីនៃអស្ថិរភាពសម្រាប់សាធារណរដ្ឋអ៊ីស្លាមនេះទៀតដែរ។ សង្គ្រាមស្រមោលដ៏រ៉ាំរ៉ៃរបស់អ៊ីរ៉ង់ជាមួយអ៊ីស្រាអែលបានផ្ទុះឡើង បន្ទាប់ពីការវាយប្រហារកាលពីថ្ងៃទី៧ ខែតុលា ដោយក្រុមហាម៉ាស់ ហើយប្រទេសទាំងពីរបានឌឺដង និងវាយប្រហារគ្នាដោយផ្ទាល់។
នៅក្នុងប្រទេស ប្រជាជនអ៊ីរ៉ង់ជាច្រើនកំពុងអំពាវនាវឱ្យបញ្ចប់ការគ្រប់គ្រងបែបសាសនា រីឯអំពើពុករលួយ និងទណ្ឌកម្មអន្តរជាតិកំពុងបំផ្លាញសេដ្ឋកិច្ចជាតិ។ លោក ខាំមេនី មានអាយុ៨៥ឆ្នាំ ហើយសុខភាពរបស់គាត់មានសភាពយ៉ាប់យ៉ឺន។ លោក រ៉ៃស៊ី ជាអ្នកអភិរក្សនិយម ដែលបានកម្ទេចក្រុមប្រឆាំង ត្រូវបានគេមើលឃើញថា ជាអ្នកស្នងតំណែងដ៏មានសក្ដានុពល។
ព័ត៌មានលម្អិតអំពីការធ្លាក់យន្តហោះ៖ ប្រព័ន្ធផ្សព្វផ្សាយរដ្ឋរបស់អ៊ីរ៉ង់បានទម្លាក់កំហុសលើ “បញ្ហាបច្ចេកទេស” ចំណែកមនុស្សមួយចំនួនបានលើកឡើងថា ទណ្ឌកម្មអន្តរជាតិជាច្រើនទសវត្សរ៍បានដើរតួនាទីយ៉ាងសំខាន់ ដែលបានរារាំងប្រទេសអ៊ីរ៉ង់ មិនឱ្យមានលទ្ធភាពទិញយន្តហោះថ្មី ឬគ្រឿងបន្លាស់យន្តហោះពីបស្ចិមលោក។
ការវិភាគ៖ មេដឹកនាំបន្ទាប់របស់អ៊ីរ៉ង់ ដែលស្ទើរតែសុទ្ធសឹងជាក្រុមប្រកាន់តឹង នឹងត្រូវជ្រើសរើសថា តើពួកគេនឹងបន្តប្រតិបត្តិការដោយប្រយ័ត្នប្រយែង ក្នុងការប្រឈមមុខជាមួយសហរដ្ឋអាមេរិក ឬយ៉ាងណា។
ប្រភព៖ ដកស្រង់ពីដំណឹងសង្ខេបរបស់សារព័ត៌មាន ញូយ៉ក ថាយម៍
