ខោកហើយ អង្អែលខ្នង! តើអាជ្ញាបណ្ណ អាចនឹងបានវិញទេ? អតីតចាងហ្វាងសារព័ត៌មាន CCN TV លោក មាស សារ៉ា ដែលរដ្ឋមន្ត្រីព័ត៌មាន ដកអាជ្ញាបណ្ណ ត្រូវបានហៅទៅជួបវិញ ក្រោយដោះលែង

អតីតចាងហ្វាងសារព័ត៌មានអនឡាញ CCN TV លោក មាស សារ៉ា ដែលបាត់បង់អាជ្ញាបណ្ណ ត្រូវបានលោករដ្ឋមន្ត្រីក្រសួងព័ត៌មាន នេត្រ ភក្ត្រា ហៅទៅជួបវិញនៅថ្ងៃទី២៨ ខែសីហា នេះ ក្រោយពីចាប់ឃុំខ្លួនរយៈពេលខ្លីករណីផ្សាយផ្ទាល់ពីបញ្ហាព្រំដែន ហើយត្រូវបានដោះលែងឱ្យមានសេរីភាពកាលពីថ្ងៃម្សិលមិញ ប៉ុន្តែការជួបរដ្ឋមន្ត្រីព័ត៌មាន មិនដឹងថា លោកទទួលការទូន្មាន ស្តីបន្ទោស ឬក៏លើកទឹកចិត្តឡើងវិញ ឬយ៉ាងណានោះទេ ដោយលោកគ្រាន់តែបញ្ជាក់ថា ជាការណែនាំដ៏ល្អសម្រាប់លោក។

លោក មាស សារ៉ា បានសរសេរលើទំព័រហ្វេសប៊ុករបស់ខ្លួនប្រហែល១ម៉ោងមុន នាថ្ងៃទី២៨ សីហា ថា ថ្ងៃនេះលោកមានកិត្តិយស ដែលបានលោក នេត្រ ភក្ត្រា រដ្ឋមន្ត្រីក្រសួងព័ត៌មានផ្តល់ឱកាសឱ្យលោកបានចូលសម្តែងការគួរសម និងណែនាំអប់រំនៅត្រង់ចំណុច ដែលលោកខ្វះខាតមួយចំនួននៅពេលកន្លងមក៕