មេបក្សជំទាស់ និងមន្ត្រីសង្គមស៊ីវិល ថា រដ្ឋាភិបាល រៃអង្គាសថវិកា កសាងហេដ្ឋារចនាសម្ព័ន្ធតាមព្រំដែន ត្រូវតែមានតម្លាភាព និងតាមឆន្ទៈពលរដ្ឋ

លោកនាយករដ្ឋមន្ត្រី ហ៊ុន ម៉ាណែត បាននិងកំពុងអំពាវនាវកៀរគររកថវិកា កសាងហេដ្ឋារចនាសម័ន្ធនៅខេត្តចំនួន៤ តាមព្រំដែន។ ក្នុងកាលៈទេសៈនេះ ប្រធានគណបក្សជំទាស់ និងមន្ត្រីសង្គមស៊ីវិល លើកឡើងថា ត្រូវធ្វើដោយតម្លាភាព និងតាមឆន្ទៈពិតប្រាកដរបស់ពលរដ្ឋ ចៀសវាងនយោបាយប្រជាភិថុតិ។

ការប្រកាសរកថវិកានៅថ្ងៃទី២៦ សីហា លោកនាយករដ្ឋមន្ត្រី ហ៊ុន ម៉ាណែត បញ្ជាក់លើទំព័រហ្វេសប៊ុក របស់លោកថា មូលនិធិកសាងហេដ្ឋារចនាសម័្ពន្ធតាមព្រំដែន ក្នុងគោលបំណង ដើម្បីកៀរគរថវិកាបន្ថែម សម្រាប់កសាងហេដ្ឋារចនាសម្ព័ន្ធនានានៅតាមបណ្តោយព្រំដែន ព្រមទាំងបានផ្តល់ឱកាសឱ្យប្រជាពលរដ្ឋខ្មែរនៅទូទាំងប្រទេស បានចូលរួមចំណែក ដោយផ្ទាល់ជាមួយរាជរដ្ឋាភិបាល ក្នុងបុព្វហេតុការពារ និងអភិវឌ្ឍជាតិ ក្នុងស្មារតីមហាសាមគ្គីជាតិខ្មែរ ដើម្បីថែរក្សាសុខសន្តិភាព អធិបតេយ្យ និងបូរណភាពទឹកដី ក៏ដូចជាការជំរុញការអភិវឌ្ឍនៅតាមតំបន់ព្រំដែនឱ្យបានកាន់តែរឹងមាំ និងប្រកបដោយចីរភាព។

ចាប់ពីថ្ងៃទី១ នៃការកៀរគរថវិកា រហូតដលថ្ងៃទី២៧ សីហា គេឃើញមានថ្នាក់ដឹកនាំនៅតាមស្ថាប័ន មន្ត្រីរាជការ និងកងកម្លាំងប្រដាប់អាវុធ បានចូលរួមបរិច្ចាគថវិកា និងបានបង្ហោះលើបណ្តាញសង្គមហ្វេសប៊ុកជាបន្តបន្ទាប់ ដោយម្នាក់ៗបានបរិច្ចាគរាប់ម៉ឺន និងរាប់លានរៀលទៅក្នុងមូលនិធិកសាងហេដ្ឋារចនាសម្ព័ន្ធតាមព្រំដែន តាមការអំពាវនាវរបស់លោកនាយករដ្ឋមន្ត្រី ហ៊ុន ម៉ាណែត។

ប្រធានគណបក្សជំនាន់ថ្មី លោក មាជ សុវណ្ណារ៉ា ថ្លែងថា ការការអំពាវនាវរកថវិកា សម្រាប់ការអភិវឌ្ឍតាមព្រំដែននេះមិនមែនជារឿងខុសឆ្គងទេ ប៉ុន្តែដំណើរការអភិវឌ្ឍនេះ ត្រូវធ្វើទៅតាមសមានចិត្តរួមរបស់ប្រជាពលរដ្ឋ និងមានតម្លាភាព។ លោកថា ការអំពាវនាវរកថវិកានេះ កើតឡើងក្រោយព្រឹត្តិការណ៍ ដែលប្រជាពលរដ្ឋ និងរដ្ឋាភិបាល មិនចុះសម្រុងគ្នាលើគម្រោងអភិវឌ្ឍន៍តំបន់ត្រីកោណ កម្ពុជា ឡាវ វៀតណាម(CLV)។ ការណ៍នេះកើតឡើង ដោយសារពលរដ្ឋសង្ស័យពីការបាត់បង់ទឹកដីទៅថ្ងៃអនាគត ដែលពលរដ្ឋគិតទៅដល់អតីតកាល ដិតដាមដោយប្រវត្តិសាស្ត្រនាពេលកន្លងទៅ។

លោក មាជ សុវណ្ណារ៉ា បញ្ជាក់ថា៖«ខ្ញុំថា យើងត្រូវការពារពេលវេលាឱ្យពលរដ្ឋយល់ច្បាស់លាស់ក្នុងការជួយធ្វើបដិភាគហ្នឹង។ បើអ៊ីចឹង ការឯកភាពមួយទាំងបង្ខិតបង្ខំ ដែលគាត់កំពុងរងនូវវិបត្តិបំណុល បញ្ហារកស៊ីមានភាពខ្វះខាត ជួបការលំបាកនូវសេដ្ឋកិច្ចប្រចាំថ្ងៃរបស់ពួកគាត់ អ៊ីចឹងហើយ យើងពិបាកក្នុងការថា តើប្រជាពលរដ្ឋហ្នឹងអាចមានលទ្ធភាពរបៀបណា គឺមិនមែនជាការបង្ខិតបង្ខំទេ»។

លោកបន្តថា បើពលរដ្ឋរវល់តែបារម្ភគិតគូរខ្លាចបាត់ទឹកបាត់ដី ខ្លាចគេរំលោភ ជនអន្តោប្រវេសន៍ចូលមកខុសច្បាប់ ដូច្នេះធ្វើឱ្យការអភិវឌ្ឍមិនមែនសមានចិត្តនៃប្រជាពលរដ្ឋទូទាំងប្រទេស។ វាក្នុងកម្រិតនៃប្រជាពលរដ្ឋ ដែលមាននិន្នាការគណបក្សនយោបាយ គឺវានៅតែបង្ហាញការមិនឯកភាពជាតិគ្នា។

លោកសុវណ្ណារ៉ា ថ្លែងថា៖«ខ្ញុំថា វាជាការចាប់ផ្តើមដែលរដ្ឋាភិបាលត្រូវបង្ហាញនូវឆន្ទៈ នូវស្មារតីជាតិនិយម នូវការអភិវឌ្ឍបែបតម្លាភាព បើកចំហដោយឱ្យហេតុផល ហើយបញ្ចប់ការចាប់ដាក់គុក ការដាក់ខ្នោះប្រជាពលរដ្ឋ ដែលគេមានទស្សនៈផ្ទុយ។ យើងមិននិយាយអំពើហិង្សាគំនិតជ្រុលនិយមណា ក្រៅតែពីគំនិតណា ដែលឱ្យជាហេតុជាផល យើងត្រូវឱ្យអភ័យ មានការយោគយល់សណ្តោសគ្នា»។

អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ថ្លែង នៅថ្ងៃទី២៧ សីហាថា គម្រោងអភិវឌ្ឍន៍តាមព្រំដែននេះ រដ្ឋាភិបាលចាំបាច់ ត្រូវរៀបចំផែនការឱ្យបានច្បាស់លាស់ ហើយចាប់ឱ្យត្រូវគោលដៅក្នុងការអភិវឌ្ឍហេដ្ឋារចនាសម្ព័ន្ធសព្វបែបយ៉ាងនៅតាមតំបន់ព្រំដែន។ បន្ថែមពីនេះ រដ្ឋាភិបាល គួរតែបំពេញបន្ថែមនូវព័ត៌មានពិស្តាអំពីការអភិវឌ្ឍនៅតាមតំបន់ព្រំដែន ថា តើអភិវឌ្ឍទៅលើហេដ្ឋារចនាសម្ព័ន្ធអ្វីខ្លះ ហើយរដ្ឋាភិបាលក៏ត្រូវបង្ហាញអំពីចំនួនថវិកា និងរយៈពេលក្នុងការកសាង ដើម្បីងាយស្រួលក្នុងការគ្រប់គ្រងចាត់ចែងថវិកា និងដំណើរការអភិវឌ្ឍ។

លោកសុជាតិ បញ្ជាក់ថា៖«នេះគឺជាកាតព្វកិច្ចសំខាន់ណាស់ ហើយក្នុងករណី ដែលមិនមានព័ត៌មានពិស្តា អ៊ីចឹងវាជាការព្រួយបារម្ភមួយដែរ ដែលការបរិច្ចាគរបស់ពួកគាត់ មិនដឹងថា បរិច្ចាគទៅលើអ្វីឱ្យច្បាស់លាស់ ហើយចំនួនប៉ុន្មាន។ អ៊ីចឹង រដ្ឋាភិបាលគួរមានធនធានមនុស្ស ហើយធ្វើរបាយការណ៍បង្ហាញដល់ប្រជាពលរដ្ឋ…ខ្ញុំជឿជាក់ថា នឹងមានការចូលរួមកាន់តែច្រើនទៀត ហើយប្រជាពលរដ្ឋក៏សប្បាយចិត្តនឹងការអភិវឌ្ឍហ្នឹងដែរ»៕