អ្នកនាំពាក្យរងក្រសួងមហាផ្ទៃ ច្រានចោលរបាយការណ៍អន្តរជាតិមួយដែលបានផ្សាយថា កម្ពុជាមានបទល្មើសច្រើនជាងគេនៅអាស៊ី

ភ្នំពេញៈ លោក ទូច សុឃៈ អ្នកនាំពាក្យរងក្រសួងមហាផ្ទៃបានពិនិត្យមើលរបាយការណ៍របស់ Numbeo ពិសេស របៀបនៃការវាយតម្លៃ និងប្រភពទិន្នន័យដើម ដែលពួកគេទទួលបាន ដោយលោកចាត់ទុករបាយការណ៍នេះ មានចរិតនយោបាយ ដាក់បន្ទុកលើកម្ពុជា ដែលមិនអាចទទួលយកបាន។

ក្នុងបទបង្ហាញលទ្ធផល នៃការគ្រប់គ្រងសកម្មភាពអវិជ្ជមានក្នុងសង្គម ដើម្បីសន្តិសុខ សណ្ដាប់ធ្នាប់ និងសុវត្ថិភាពសង្គម នាថ្ងៃទី៤ កក្កដា នៅក្រសួងមហាផ្ទៃ លោក ទូច សុឃៈ បានសង្កត់ធ្ងន់ថា៖<<យើងអាចវាយតម្លៃ ជាជំហានដំបូងថា របាយការណ៍ ឬការដាក់ចំណាត់ថ្នាក់នេះ មានចេតនាមិនល្អ ច្រើនជាងល្អ មានចេតនាទុច្ចរិតច្រើនជាងសុចរិត>>។

រយៈពេលប៉ុន្មានថ្ងៃនេះ បណ្ដាញសង្គមបរទេសមួយចំនួន និងមហាជនក្នុងប្រទេស បានរិះគន់ថា កម្ពុជាឈរលេខ១ ក្នុងចំណាត់ថ្នាក់ខ្ពស់ជាងគេ ក្នុងតំបន់អាស៊ាន ដែលមានបទល្មើស។ បើតាម Numbeo បញ្ហាពុករលួយ បញ្ហាគ្រឿងញៀន និងការកើនឡើងនៃបទល្មើសក្នុងរយៈពេល៥ឆ្នាំ នៅកម្ពុជា ជាបញ្ហាចម្បង។

ទាក់ទិននឹង របាយការណ៍ខាងលើ អ្នកនាំពាក្យក្រសួងមហាផ្ទៃ អះអាថា វាបង្កឱ្យមានផលប៉ះពាល់នៃសេចក្ដីថ្លៃថ្នូររបស់កម្ពុជា ជាពិសេសវិស័យទេសចរណ៍ សេដ្ឋកិច្ច ពាណិជ្ជកម្ម  និងការវិនិយោគផងដែរ ព្រោះកន្លងមកកម្ពុជាខិតខំបង្ក្រាបបទល្មើស និងរក្សាសន្តិសុខ ដោយពង្រឹងវិធានការភូមិ ឃុំ សុវត្ថិភាព បង្ក្រាបក្មេងទំនើង និងល្បែងស៊ីសង ដើម្បីរក្សាសុវត្ថិភាពជូនប្រជាពលរដ្ឋនិងអ្នកវិនិយោគនៅកម្ពុជា៕