Your Hot News in Hands

BREAKING NEWS

ជប៉ុនបន្តផ្តល់ជំនួយលើការផ្ទេរចំណេះដឹង បច្ចេកវិទ្យា និងសម្ភារក្នុងការងារជួសជុល អភិរក្សរមណីយដ្ឋានអង្គរ និងសំបូរព្រៃគុក

170

 

គណៈកម្មាធិការអន្តរជាតិ សម្របសម្រួល កិច្ចគាំពារ និងអភិវឌ្ឍន៍រមណីយដ្ឋានអង្គរ និងសំបូរព្រៃគុក របស់អង្គការ UNESCO កំពុងបើកកិច្ចប្រជុំពេញអង្គ លើកទី៣០នៅខេត្តសៀមរាប នាព្រឹកថ្ងៃទី១៥ ខែមីនា នេះ។

កិច្ចប្រជុំពេញអង្គ ដឹកនាំដោយសហប្រធានឯកអគ្គរដ្ឋទូតបារាំង និងជប៉ុន ប្រចាំព្រះរាជាណាចក្រកម្ពុជា បានពិភាក្សាទៅលើសេចក្តីប្រកាសរួម របស់អន្តររដ្ឋាភិបាល ដែលបានប្រព្រឹត្តទៅនៅទីស្នាក់ការ UNESCO ក្នុងទីក្រុងប៉ារីស កាលពីថ្ងៃទី១៥ ខែវិច្ឆិកា ឆ្នាំ២០២៣ ស្ដីពីរមណីយដ្ឋានអង្គរ និងសំបូរព្រៃគុក ដោយផ្តោតលើយុទ្ធសាស្ត្រ ជាច្រើនសម្រាប់ការងារអភិរក្ស និងអភិវឌ្ឍន៍ សហគមន៍មូលដ្ឋាន ការអភិវឌ្ឍន៍ សេដ្ឋកិច្ច និងវប្បធម៌ បង្កើនប្រាក់ចំណូលផ្នែកកសិកម្ម សិប្បកម្ម តាមរយៈការបណ្តុះបណ្តាលធនធានមនុស្ស ការផ្តល់សម្ភារ និងហេដ្ឋា រចនាសម្ព័ន្ធសមស្របក្នុងតំបន់រមណីយដ្ឋានអង្គរនិងសំបូរព្រៃគុក ក្នុងរយៈពេល១០ឆ្នាំតទៅមុខទៀត។

សហប្រធានបារាំង លោក Piere PELLET ថ្លែងក្នុងកិច្ចប្រជុំពេញអង្គនោះថា ការងារអភិរក្ស និងអភិវឌ្ឍន៍រមណីយដ្ឋានអង្គរ ពិតជាមានបញ្ហាប្រឈមមិនតិចតួចឡើយ ប៉ុន្តែអ្នកគ្រប់គ្នាបានប្រឹងប្រែងជម្នះបញ្ហាទាំងនេះ រហូតដល់បានជោគជ័យ។

លោក PELLET បញ្ជាក់ទៀតថា យុទ្ធសាស្រ្តសម្រាប់ការអភិរក្ស និងអភិវឌ្ឍន៍រមណីយដ្ឋានអង្គរនិងសំបូរព្រៃគុក រយៈពេល១០ឆ្នាំទៅមុខទៀត គឺផ្ដោតលើចំណុចសំខាន់ៗមួយចំនួន ដូចជាបង្កើនការអភិវឌ្ឍន៍ ប្រកបដោយចីរភាពនៃរមណីយដ្ឋានអង្គរ។ បន្តការពារអភិរក្សតម្លៃលេចធ្លោជាសកល ដោយយកចិត្តទុកដាក់លើការប្រែប្រួលអាកាសធាតុ ការការពារបរិស្ថាន ទេសភាពវប្បធម៌ ការថែរក្សាធនធានធម្មជាតិ(ទឹកនិងព្រៃឈើ) ។
ការអភិវឌ្ឍន៍សហគមន៍មូលដ្ឋាន លើកកម្ពស់ការថែរក្សាប្រាង្គប្រាសាទ និងសកម្មភាពទេសចរណ៍ ប្រកបដោយស្មារតីទទួលខុសត្រូវ ។

បង្កើនសមត្ថភាពអ្នកជំនាញខ្មែរ ដើម្បីឆ្លើយតបនិងតម្រូវការពហុជំនាញនៃការគ្រប់គ្រង តាមរយៈការបណ្តុះបណ្តាល សិក្ខាសាលា អាហារូបករណ៍នៅបរទេស ការងារនៅតាមកន្លែង ការបំពេញ ភារកិច្ចជាក្រុម និងការគ្រប់គ្រងស្ថាប័នដោយប្រើប្រាស់បច្ចេកវិទ្យាទំនើប និងវិធីសាស្រ្តថ្មីៗ។
ពង្រឹងកិច្ចសហប្រតិបត្តិការអន្តរជាតិរបស់គណៈកម្មាធិការអាយស៊ីស៊ីអង្គរ និងសំបូរព្រៃគុក ដែលជាយន្តការ គំរូដោយផ្តោតការយកចិត្តទុកដាក់ទៅលើការផ្ទេរនូវចំណេះដឹងជំនាញ និងបទពិសោធន៍ពីអ្នកជំនាញអន្តរជាតិមកអ្នកជំនាញខ្មែរជាដើម។

អនុរដ្ឋមន្ត្រីក្រសួងការបរទេសនិងជាតំណាងរាស្ត្រជប៉ុន លោក Masahiro Komura ថ្លែងថា ការអភិរក្សអង្គរ គឺជាសេចក្តីប្រាថ្នាដែលត្រូវចែករំលែកធ្វើការរួមគ្នា។ ដូច្នេះការពង្រឹងធនធានមនុស្ស សម្រាប់ការងារអភិរក្ស និងអភិវឌ្ឍន៍ គឺជាការចែករំលែករួមគ្នាដើម្បីជួយដល់បេតិកភណ្ឌ ដែលជាសម្បត្តិរបស់មនុស្សជាតិ។

លោក Masahiro Komura ថ្លែងទៀតថា៖<< ជប៉ុននឹងបន្តផ្តល់ជំនួយដោយផ្អែកលើកម្លាំងរបស់យើង។ ជំនួយទាំងនេះរួមបញ្ចូលទាំងការសម្របសម្រួល ការផ្ទេរជំនាញ ចំណេះដឹង និងបច្ចេកវិទ្យា រវាងអ្នកជំនាញរបស់យើងនិងសមភាគីក្នុងស្រុក>>។

ក្នុងដំណើរការនេះ ប្រទេសជប៉ុនមានការប្តេជ្ញាចិត្តយ៉ាងមុតមាំក្នុងការធ្វើការយ៉ាងជិតស្និទ្ធជាមួយនឹងដៃគូដែលមានតាំងពីយូរមកហើយ រួមមានអង្គការយូណេស្កូ(UNESCO)  អាជ្ញាធរជាតិអប្សរា រាជរដ្ឋាភិបាលកម្ពុជា និងរដ្ឋាភិបាលបារាំងជាដើម៕