លើបណ្តាញសង្គម មហាជននៅតែផ្តោតលើការធ្លាក់ចុះចំនួនទេសចរ នៅខេត្តសៀមរាប ក្នុងនោះស្ត្រីថៃម្នាក់ ក៏បាននិយាយពីសភាពស្ងាត់នៅព្រលានយន្តហោះសៀមរាប តែមន្ត្រីថា រយៈពេល៥ខែ ឆ្នាំនេះកម្ពុជាមានទេសចរ ២លាន៦សែននាក់

ប៉ុន្មានថ្ងៃកន្លងទៅ និងមកដល់ពេលថ្មីៗនេះទៀត មហាជននៅតែចាប់អារម្មណ៍ ទៅលើតំបន់ទេសចរណ៍ខេត្តសៀមរាប ដែលគេមើលឃើញថា កំពុងស្ថិតក្នុងកាលៈទេសៈមានការធ្លាក់ចុះខ្លាំងនូវចំនួនទេសចរ បើប្រៀបនឹងប្រទេសជិតខាង។ ជាក់ស្តែងស្ត្រីជនជាតិថៃម្នាក់ ដែលបានមកដល់អាកាសយានដ្ឋានអន្តរជាតិសៀមរាប ក៏បាននិយាយ ដោយភ្ជាប់វីដេអូ បង្ហាញពីស្ថានភាពស្ងាត់គ្មានភ្ញៀវនៅទីនោះផងដែរ។

ប៉ុន្តែអ្នកនាំពាក្យក្រសួងទេសចរណ៍ លោក តុប សុភ័គ បញ្ជាក់ថា បើនិយាយពីស្ថានភាពទេសចរនៅកម្ពុជា មាន២ប្រភេទ ទី១ ទេសចរអន្តរជាតិ គឺសំដៅលើទេសចរបរទេសធ្វើដំណើរចូលមកប្រទេសកម្ពុជា។ ទី២ គឺស្ថានភាពទេសចរផ្ទៃក្នុង ហើយទេសចរផ្ទៃក្នុងនេះមានទាំងទេសចរជនជាតិខ្មែរ និងជនជាតិផ្សេងៗទៀត ដែលគាតបំផ្លាស់ទីពីគោលដៅមួយ ទៅគោលដៅមួយ។

លោកសុភ័គ ប្រាប់ The Cambodia Now នៅថ្ងៃទី៦ កក្កដា ថា៖«បើយើងនិយាយសម្រាប់ទេសចរចលនាផ្ទៃក្នុងមិនមានបញ្ហាទេ ព្រោះចរន្តទេសចរផ្ទៃក្នុងនេះមានការកើនឡើងលឿនជាងចលនាទេសចរអន្តរជាតិ ទេសចរ ដែលមកពីក្រៅប្រទេស។ បើយើងមើលពីស្ថិតិ រយៈពេល៥ខែ ឆ្នាំ២០២៤នេះ កម្ពុជារបស់យើងទទួលបានទេសចរអន្តរជាតិ ប្រមាណជា ២ ៦០០ ០០០នាក់។ នេះក្របខ័ណ្ឌទូទាំងប្រទេស»។

លោកឱ្យដឹងថា តួលេខនេះ បើធៀបនឹងឆ្នាំ២០២៣ ចំនួនមិនថយទេ ព្រោះកើនឡើង ២២,១ភាគរយ។ តែបើធៀបទៅឆ្នាំ២០១៩ ចំនួនទេសចរអន្តរជាតិ រយៈពេល៥ខែ ២០២៤នេះ គឺទើបតែស្មើនឹងប្រមាណ៩១ភាគរយ មានន័យថា ទេសចរអន្តរជាតិមិនទាន់ត្រឡប់មកវិញដូចដើមទេ។
ទោះយ៉ាងណា លោក តុប សុភ័គ បាននិយាយថា៖«ក៏ប៉ុន្តែចលនាទេសចរអន្តរជាតិនៅសៀមរាប គឺយើងទទួលស្គាល់ថា មិនទាន់មានចំនួនច្រើន។ សៀមរាប ពីមុនក្នុង១ថ្ងៃមានទេសចរបរទេស ដែលទិញសំបុត្រចូលអង្គរហ្នឹង ចន្លោះពី ៨ ០០០ ទៅ ៩ ០០០នាក់ ជាមធ្យម ហើយបច្ចុប្បន្ន យើងមានតែប្រហែលជា ១ ៥០០នាក់ យើងនិយាយជារួម។ ថ្ងៃខ្លះ១ ៣០០ ថ្ងៃខ្លះក៏លោតទៅដល់ ១ ៧០០-១ ៨០០ អ៊ីចឹង ជាមធ្យម ចន្លោះហ្នឹង»។

លោកសុភ័គ បញ្ជាក់ថា អ៊ីចឹងមានន័យថា ទេសចរអន្តរជាតិ ដែលមកលេងខេត្តសៀមរាបនេះ នៅចំនួនតិចនៅឡើយទេ បានប្រហែលជាខ្ទង់ ២០ភាគរយជាង ទៅ ៣០ភាគរយប៉ុណ្ណឹង។ អ៊ឹចឹង មើលជារួមទៅ ឃើញថា នៅសៀមរាបរាងស្ងាត់ តែមិនមែនមានន័យថា គ្មានទេសចរទេ។ គិតថា ស្ងាត់ ដោយសារតែពីមុន វាធ្លាប់មានចំនួនច្រើន។

ពាក់ព័ន្ធនឹងការលើកឡើងរបស់ស្ត្រីជនជាតិថៃម្នាក់ ដែលភ្ជាប់នូវវីដេអូ ហើយនិយាយពីស្ថានភាពស្ងាត់នៅព្រលានយន្តហោះនៅខេត្តសៀមរាបនោះ លោក តុប សុភ័គ បញ្ជាក់ថា៖«ហ្នឹងជារឿងធម្មតាទេ អ្នកដែលមិនគាំទ្រយើង អ្នកដែលគេចង់ជាន់ពន្លិចយើង គេមិនចង់ថត នៅពេលដែលមានភ្ញៀវទេ។ គេមកថត នៅពេលដែលស្ងាត់អ៊ីចឹងហើយ»។

លោកឱ្យដឹងថា នៅសៀមរាបនេះ ពិតមែនចំនួនទេសចរអន្តរជាតិ មិនទាន់បានដល់ដូចមុនវិបត្តិកូវីដ១៩ ប៉ុន្តែក្នុង១ថ្ងៃមានយន្តចុះជាង១០ជើងដែរ ប្រហែលជា១៥ ទៅ ១៩ជើង មានន័យថា មិនស្ងាត់ពេកទេ គ្រាន់តែមិនច្រើនដូចមុន។

គណនីហ្វេសប៊ុក ឈ្មោះ Chuon Som Nop បានស្នើឱ្យរដ្ឋមន្ត្រីក្រសួងទេសចរ ចេញមុខបកស្រាយផង ហើយត្រូវហ៊ាននិយាយការពិត កុំនិយាយការពារ។ គណនីនេះបានលើកឡើងថា៖«គ្មានវិបត្តិសកលស្អីទេ ប្រទេសគេជើងហោះហើរមិនដាច់ ស្រុកខ្មែរហេតុអីស្ងាត់…»។
គណនីហ្វេសប៊ុក ឈ្មោះ Kim Hong ក៏បានសម្តែងនូវការអស់សង្ឃឹមខ្លាំង ចំពោះស្ថានភាពនៃការធ្លាក់ចុះនូវចំនួនភ្ញៀវទេសចរនេះ។ Kim Hong បានសរសេរថា៖«មិនគួរណាយើងដើរដល់ចំណុចនេះសោះ ទោះសើច ឬយំ អ្នកដែលទទួលថ្មបាក់នេះ គឺប្រជាជន មិនមែនអ្នកធំទេ»។

ចំណែកគណីហ្វេសប៊ុក ឈ្មោះ Soy Phearun Kpc បានសរសេរថា រឿងបាត់ភ្ញៀវទេសចរ ដោយសារតែអស់លោកមន្ត្រីខ្លះពុករលួយ សេវាកម្មថ្លៃ អំពើឃាតកម្មផ្សេងៗ ធ្វើឱ្យទេសចរខ្លាច មិនហ៊ានមកលេង ប៉ុណ្ណឹងហើយនៅមិនទាន់ដឹងខ្លួនទៀត។

គណនីហ្វេសប៊ុក ឈ្មោះ Ming Ming បានសរសេរដាក់សញ្ញាសំណួរថា៖«អត់ភ្ញៀវប្រជាជននាំគ្នាបន្ទោសរដ្ឋាភិបាល? វាមានកត្តាច្រើន ដែលគ្មានភ្ញៀវ តែខ្ញុំលើកតែកត្តាសំខាន់មកនិយាយទេ។ អាជីវករលក់របស់ថ្លៃ កាន់តែលក់ថ្លៃពេលភ្ញៀវបរទេសមកទិញ»។ គណនីដដែល បន្តថា បើនិយាយពីសន្តិសុខ ជនបរទេសថា កន្លែងដើរលេងមានតិច ហើយសំបុត្រថ្លៃ។ កោះ សមុទ្រ ប្រាសាទ គឺ ថៃ វៀតណាម និងឥណ្ឌូណេស៊ី ក៏មានដែរ តែតម្លៃសំបុត្ររបស់គេថោក កន្លែងលេងគេច្រើន…។

រីឯគណនីហ្វេប៊ុក ឈ្មោះ One Player ក៏បានបង្ហោះវីដេអូមួយ បញ្ចេញនូវចម្ងល់របស់ខ្លួន ចំពោះការធ្លាក់ចុះខ្លាំងនូវចំនួនភ្ញៀវទេសចរ។ លោកក៏បានបង្ហាញវីដេអូពីទិដ្ឋភាព នៃព្រលានយន្តហោះសុវណ្ណភូមិ របស់ថៃ ដែលមានភ្ញៀវទេសចរចេញចូលច្រើន។
បុរសម្នាក់នោះបាននិយាយថា៖«បងប្អូនអាចមើលបាន នេះជាទិដ្ឋភាពព្រលានយន្តហោះសុវណ្ណភូមិ នៅថៃ និយាយទៅមនុស្សច្រើនមែនទែនហ្មង។ ខ្ញុំអត់ដឹងថា នៅស្រុកខ្មែរយើង ប៉ះពាល់សេដ្ឋកិច្ច ឬក៏ប៉ះពាល់សង្គ្រាមពិភពលោកម៉េចទេ។ ប៉ុន្តែនៅស្រុកគេវិញ ភ្ញៀវបុកមក អត់ដឹងថា មកពីណា មិនថា ជាជនជាតិចិន ឬមួយក៏ជនជាតិអឺរ៉ុបអីទេ គឺមកលេងស្រុកថៃច្រើនខ្លាំងមែនទែន»។លោកបានបន្តថា លោកទើបតែមកពីខេត្តសៀមរាប កាលពីអាទិត្យមុន ហើយមានអារម្មណ៍ថា នៅសៀមរាប ស្ងាត់ៗខ្លាំង។ លោកនិយាយថា៖«និយាយទៅនឹកស្រណោះស្រុកទេសខ្លួនឯងហ្មង ស្អីក៏មាន ប្រាសាទ មានសមុទ្រស្អាត…»។

ពាក់ព័ន្ធនឹងការអធិប្បាយរបស់ស្រ្តីជនជាតិថៃម្នាក់ ដោយភ្ជាប់មកជាមួយនូវវីដេអូ ដែលបានបង្ហាញពីស្ថានភាពស្ងាត់របស់ព្រលានយន្តហោះអន្តរជាតិសៀមរាបនោះ បើតាមអត្ថន័យ គឺនាងម្នាក់នោះបាននិយាយពីសេវា សម្រាប់ធ្វើដំណើរចេញពីព្រលានទៅទីរួមខេត្ត មានតម្លៃថ្លៃ និងអាហារលក់ក្នុងព្រលាន ក៏លក់ក្នុងតម្លៃថ្លៃ ដោយនាងបានបង្ហាញមីគៀវ១ចាន តម្លៃជាង៣ម៉ឺនរៀល។ កត្តាទាំងនេះហើយ ដែលធ្វើឱ្យមានការធ្លាក់ចុះនូវចំនួនភ្ញៀវទេសចរ។

ទោះយ៉ាងណា អាជ្ញាធរជាតិអប្សរា បានផ្សព្វផ្សាយពីភ្ញៀវទេសចរ ដែលមើលទៅមានចំនួនច្រើន បានមកទស្សនាប្រាសាទអង្គរវត្ត កាលពីថ្ងៃទី៤ និងថ្ងៃទី៥ កក្កដា ឆ្នាំ២០២៤ ដែលជាតំបន់ទេសចរណ៍យ៉ាងទាក់ទាញនៅខេត្តសៀមរាប។ អាជ្ញាធរជាតិអប្សរា ក៏បានបង្ហាញពីរូបភាព នៃទិដ្ឋភាពភ្ញៀវទេសចរ ចូលទស្សនាប្រាសាទតាព្រហ្ម និងប្រាសាទនាគព័ន្ធផងដែរ៕