Your Hot News in Hands

BREAKING NEWS

មេបក្សកម្លាំងជាតិចាត់ទុកបណ្តឹងលើរូបលោកពាក់ព័ន្ធការឆបោកលុយជាង១០លានរៀលនោះ ជារឿងនយោបាយ

54

ប្រធានគណបក្សកម្លាំងជាតិ លោក ស៊ុន ចន្ធី អះអាងថា បណ្តឹងលើរូបលោក ដែលសមាជិកគណបក្សភ្លើងទៀនបានរៀបចំប្តឹង ដោយចោទថា លោកបានឆបោកលុយជាង១០លានរៀលនោះ គឺជារឿងនយោបាយសុទ្ធសាធ។
លោក ស៊ុន ចន្ធី បានសរសេរលើទំព័រហ្វេសប៊ុករបស់លោក កាលពីថ្ងៃទី៦ ខែមីនា ថា៖«គណបក្សភ្លើងទៀន បានរៀបចំសេណារីយោ ប្តឹងប្រធានគណបក្សកម្លាំងជាតិ ក្នុងហេតុផលនយោបាយសុទ្ធសាធ»។
គណបក្សកម្លាំងជាតិ ត្រូវបានគេមើលឃើញថា ជាបក្សប្រកួតប្រជែងនឹងគណបក្សប្រជាជនកម្ពុជា របស់លោក ហ៊ុន សែន ដែលជាបក្សកំពុងកាន់អំណាចរដ្ឋ ដោយមានលោកហ៊ុន ម៉ាណែត ជាប្រមុខរដ្ឋាភិបាល។
យោងតាមពាក្យបណ្តឹង ដែលប្តឹងដោយលោក ស៊ន ស៊ុនហេង ប្រធានប្រតិបត្តិគណបក្សភ្លើងទៀនស្រុកសន្ទុក ខេត្តកំពង់ធំ ដោយភ្ជាប់ជាមួយនូវឈ្មោះសមាជិកបក្សភ្លើងទៀនចំនួន៧នាក់ទៀត បានប្តឹងលោកស៊ុន ចន្ធី អតីតប្រធានប្រតិបត្តិគណបក្សភ្លើងទៀនទៅសាលាដំបូងខេត្តកំពង់ធំ ពីបទឆបោកថវិកា។ ដើមបណ្តឹងចោទថា លោក ស៊ុន ចន្ធី បានប្រមូលថវិកាពីសមាជិកចំនួន១៩នាក់ ក្នុងម្នាក់ៗត្រូវបង់ថវិកាចំនួន ១ ៦០០ ០០០រៀល។
ពាក្យបណ្តឹងបន្តថា សមាជិកខ្លះបានបង់គ្រប់ចំនួន និងសមាជិកខ្លះបានបង់ពាក់កណ្តាល ដើម្បីធ្វើការឃោសនាបោះឆ្នោតគណបក្សភ្លើងទៀន ក្នុងឆ្នាំ២០២៣។ ក្រោយពីបានប្រមូលថវិកាពីសមាជិកចំនួន១៩នាក់ ដែលមានថវិកាចំនួន ២៨ ៤០០ ០០០រៀល ឈ្មោះស៊ុន ចន្ធី ក៏បានសន្យាថា បើគណបក្សភ្លើងទៀនមិនបានធ្វើការឃោសនាទេ លោកនឹងប្រគល់ប្រាក់ ដែលបានបង់ទាំងអស់នោះឳ្យសមាជិក១៩នាក់វិញ។ ក្រោយមកស្រាប់តែឈ្មោះស៊ុន ចន្ធី បានលាឈប់ពីប្រធានប្រតិបត្តិគណបក្សភ្លើងទៀន ហើយបានយកថវិកា ដែលបានប្រមូលទាំងអស់ទៅបង្កើតគណបក្សផ្សេងមួយទៀត ដោយមិនបានប្រគល់ថវិកាទាំងអស់នោះមកវិញទេ។
ប៉ុន្តែ បើតាមពាក្យបណ្តឹង ដើមបណ្តឹងបានស្នើសុំឳ្យព្រះរាជអាជ្ញាសាលាដំបូងខេត្តកំពង់ធំជួយអន្តរាគមន៍ និងរកយុត្តិធម៌ជូនពួកគេចំនួនតែ ៨នាក់ប៉ុណ្ណោះ ក្នុងចំណោម១៩នាក់ ដែលថា បានបង់លុយឳ្យលោកស៊ុន ចន្ធី។ ពួកគេបានសុំឳ្យតុលាការ ផ្តន្ទាទោសឈ្មោះ ស៊ុន ចន្ធី ទៅតាមផ្លូវច្បាប់ និងបង្គាប់ឳ្យឈ្មោះ ស៊ុន ចន្ធី សងប្រាក់ចំនួន ១២ ៨០០ ០០០រៀល ទៅឳ្យពួកគេចំនួន ៨នាក់វិញ។
ពាក់ព័ន្ធរឿងបណ្តឹងនេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា ដែលកាន់អំណាច ថ្លែងថា រឿងនយោបាយ ឬមិនមែននយោបាយ គឺអាស្រ័យលើតុលាការ។ បើតុលាការទទួលពាក្យបណ្តឹងហើយ ត្រូវរង់ចាំមើលចំណាត់ការរបស់តុលាការសិន មិនអាចសន្និដ្ឋានបានថា ជារឿងបែបណានោះទេ។
លោកបញ្ជាក់ថា៖«បើតុលាការទទួល[ពាក្យបណ្តឹង] ទុកលើតុលាការចាត់នីតិវិធី អាហ្នឹងបានដឹង ស ខ្មៅ យ៉ាងម៉េច។ បើគាត់អត់មានពិរុទ្ធភាព អត់មានល្មើសច្បាប់ទេ វាអត់មានបញ្ហាទេ។ រឿងនយោបាយ អាហ្នឹងរឿងគាត់ថា ប៉ុន្តែវាមិនអាស្រ័យលើគាត់ថាឯណា វាអាស្រ័យលើការស៊ើបអង្កេតរបស់តុលាការ»។
ព្រះរាជអាជ្ញារង នៃសាលាដំបូងខេត្តកំពងធំ លោក ផៃ តុងហួរ ដែលកោះហៅលោក ស៊ុន ចន្ធី មកឆ្លើយបំភ្លឺ មិនទាន់អាចស្វែងរកការទាក់ទង ដើម្បីសុំអត្ថាធិប្បាយបាននៅឡើយទេ នៅថ្ងៃទី៨ ខែមីនា នេះ៕